Read wanga TSITSABULI 148 Bible Online

TSITSABULI 148 - wanga bible

TSITSABULI 148

¹Mwitsoomie OMWAMI Nyasaye! Mumwitsoomie OMWAMI Nyasaye inywe abali mwikulu, inywe abamenyile ikulu mwikulu.

²Mumwitsoomie inywe abamalaikabe boosi, mumwitsoomie inywe abamaheke boosi.

³Mumwitsoomie inywe tsing'ining'ini etsiakhanga.

⁴Mumwitsoomie, iwe likulu elili mwikulu, nende amaatsi akali ikulu mwikulu!

⁵Lekha biosi bitsoomie eliira elia OMWAMI Nyasaye! Yalachilisia ne nibilongwa.

⁶Khulwa lilakolie biaralisibwa mubwikhalo bwabio inziayo, ne shibinyala okhulifukula tawe.

⁷Mwitsoomie OMWAMI Nyasaye inywe ebiomushialo, inywe eminyeni emikhongo chiomunyanza nende tsisiba tsiosi,

⁸inywe tsimbenu nende amachina keifula, itsaluchi nende ling'ong'ong'we, omuyeka kweimbumbuyeka, okuhulilanga lilakolie.

⁹Mumwitsoomie, inywe tsingulu nende ebikulu, emisaala chiebiamo nende emitsuru.

¹⁰Inywe tsisolo tsiosi, etsirukwa nende etsiomubulimo, ebimoolanga nende amanyonyi.

¹¹Mumwitsoomie inywe abaruchi nende abandu boosi, abaami nende abaruchi bandi boosi bokhushialo.

¹²Inywe abakhaana abaraka nende abasiani abaraka, abakofu nende kata abaana abatiiti.

¹³Leshe boosi betsoomie eliira elia OMWAMI Nyasaye! Okhuba eliiralie nelikhongo okhushila akandi koosi, oluyalilwe luli ikulu khushialo nende mwikulu.

¹⁴Yakhola lihangalie okhuralila, kho mbu abandube ba Isiraeli bamwitsoomie, Abaisiraeli abali abolukoosi muno khuye. Mwitsoomie OMWAMI Nyasaye!