Read wanga TSITSABULI 17 Bible Online

TSITSABULI 17 - wanga bible

TSITSABULI 17

¹Isaala ya Daudi Iwe OMWAMI Nyasaye, hulila okhwenya khwanje khwakatoto, recheresia okhuhaba khwanje. Orecheresie okhusaaya khwanje, okhurula mumunwa okubula obukaati!

²Ukhalachile eshiina shianje niunderera, tsimonitsio tsilole akali ka habwene.

³Omanyile omwoyo kwanje. Witsile okhunjendela mushilo, niuhenjelesia obulayi, shiolanyoolakhwo likhuwa libi liosi liosi mwisie tawe. Omunwa kwanje shikukoyaanangakhwo mumboola,

⁴shinga olwa abandi bakholanga tawe. Enindanga amalakoko, khandi shienondangakhwo khunjila tsiabandu beinduli tawe.

⁵Enjendanga munjilatsio buli lwosi, shindiberirekhwo nenzia elubeka tawe.

⁶Ekhuhabilanga iwe Nyasaye shichila emanyile mbu, umbulilanga isie. Kho orecheresie amakhuwa kanje.

⁷Manyisia obuheelibwo oburalilu, umbonie, iwe ouhoninjia abakhwilushila okhurula khubasuku babwe.

⁸Uninde shinga indolelo yeimoniyo omwene, umbise mumbahatsio,

⁹okhurula khubandu abamayanu abaaseeranga, okhurula khubasuku abalulu abambotokhaane.

¹⁰Abasuku tsana babula tsimbabasi, khandi baboolanga butswa neinjinia.

¹¹Banondachila nibambotokhana, bakhaabanga obwiyangu bwokhungwisia hasi.

¹²Bali shinga tsitalanyi tsingonesheele, bali shinga tsitalanyi tsimbuukha etsienyanga okhuurandulamwo ebitonye.

¹³Buukha, Iwe OMWAMI Nyasaye, wakaane ninabo nobahula! Olukangalwo lumbonie okhurula mumakhono kabamayanu,

¹⁴okhurula khubandu abali nende ebia benya biosi mushialo muno. Bahelesie eshinyasio eshihela, eshia wababiishila. Abaana babwe banyoole khushinyaasio eshio khandi eshindi shitoonye khulwa abetsukhulu babwe.

¹⁵Nebutswa isie, mubulunjishi, ndalakhulola mumonimwo, olwa embuukha ndalasaangaala shichila oli ahambi ninasi.