Read wanga TSITSABULI 18 Bible Online

TSITSABULI 18 - wanga bible

TSITSABULI 18

¹Khumurereesi wetsinyimbo. Itsabuli ya Daudi yembela OMWAMI Nyasaye olwa yamuhonokosia okhurula mumakhono kabasukube, khandi okhurula mumukhono kwa Saulo. OMWAMI Nyasaye, ndakhuheela, iwe niwe oumbeelesinjia amaani.

²OMWAMI Nyasaye niye obwilushilo bwanje, khandi niye olukoba lwanje. Nyasaye wanje niye obwilushilo bwanje, ndilushilanga muye, ndishinganga khuye shinga ingabo, yandereranga niyambonia.

³Emuhabilanga OMWAMI Nyasaye, naye yahonokosinjia okhurula khubasuku banje. OMWAMI Nyasaye yetsoomibwe!

⁴Emikoye chielifwa chiali nichinzikanyiilekhwo, amarunda kobusasishi nikanziniishe.

⁵Emikoye chia Emakombe chianzikanyilakhwo, nachio emireko chiolumbe chiandiila.

⁶Ndahabila OMWAMI Nyasaye nendi mumatinyu, ndahaabila Nyasaye wanje mbu, yahabine. Yahulila omwoyo kwanje ewa yali muhekalu, okhuhaba khwanje khwamuulila.

⁷Mana eshialo shiarenga nishitechela, tsinyanzo tsiebikulu nitsitechela nitsirenga shichila Nyasaye yali nasinyiishe.

⁸Omwosi kwatuumuukha okhurula mumooluke, omulilo kwolumemu nende amanda komulilo nibirula mumunwakwe.

⁹Yenamia likulu nakholomokha hasi, lileesi limali liali hasi wamakuluke.

¹⁰Yapulukha bwangu khushilonjeshie shietsimbaha, omuyeka kwamuchinga shinga linyonyi elipulukha.

¹¹Yaraho eshiilima okhumufuunikha. Amaleesi amakhongo aketsuulemwo amaatsi kamubotokhana.

¹²Amachina keifula nende amanda komulilo kamwesukha okhurula mukhwakha khwali imbeliwe mumaleesi amamali, naye nafutushila mumaleesi yako.

¹³Mana omwoyo kwa OMWAMI Nyasaye nikukukuma okhurula mwikulu ne omwoyo kwa oyo Ouli Omukhongo Muno nikuhulilikha.

¹⁴Yalasa ebisele biobuyingobwe nasalaasia abasukube, yabalondachilila netsimbenu, etsiamwekhanga.

¹⁵Emiombe chiamaatsi komunyanza chialolekha, natsio tsinyanzo tsieshialo tsiatechesibwa, olwa iwe OMWAMI Nyasaye wakondeshela abasukubo, nobakukumila muburuma.

¹⁶OMWAMI Nyasaye yanyiila omukhonokwe okhurula mwikulu niyandiila, yakhwesa okhurula mulusiba lwamaatsi.

¹⁷Yaahonokosia okhurula mubasuku banje bamaani, okhurula mubandu abaasila, okhuba bali abamaani okhuushila isie.

¹⁸Olwa ndali nendi mumatinyu, baaseera, nebutswa OMWAMI Nyasaye niye owandeetselela.

¹⁹Yarusia mumatinyu niyara halayi, yaahonokosia, shichila achamisibungwa ninasi.

²⁰OMWAMI Nyasaye yaarunga amalayi shichila ekholanga akobulunjishi, yambelesia tsikhabi shichila embula eshikha.

²¹Ndaliinda amalako ka OMWAMI Nyasaye, shindashiukhanakhwo okhurula khu Nyasaye tawe.

²²Enindanga amalakoke koosi, shindakafunakakhwo tawe.

²³Shindaalikhwo neshikha imbeliwe ta, ndeliinda obulakhola obumayanu tawe.

²⁴Khulweshio, OMWAMI Nyasaye yarunjile okhulondana nende obulunjishi bwanje, okhulondana nende obweleleshe bwomwoyo kwanje.

²⁵Iwe OMWAMI Nyasaye, oli omwisiikwa khubali abesiikwa khwiwe, ababula eshikha obakholelanga amalayi.

²⁶Oli omweleleshe khubali abeleleshe, nebutswa oli omululu khubonooni.

²⁷Ohoninjia abaholo nebutswa otutuyinjia abechinjimisi.

²⁸Iwe OMWAMI Nyasaye, niwe ounzashilinjia obulafu, norusiaho eshiilima shianje.

²⁹Unyalilanga okhuhula abasuku banje, khandi unyalilanga okhuruuma nengwisia tsingoba tsiabwe.

³⁰Tsinjila tsia OMWAMI Nyasaye netsia habwene, amakhuwake nakobusuubilwa, ali shinga eshikhumba khubandu boosi abakhabanga obuliindibwe.

³¹OMWAMI Nyasaye yenyene niye Nyasaye watoto, Nyasaye yenyene niye oukhuliindanga.

³²Niye Nyasaye oumbelesinjia amaani, oukaasinjia injila yanje.

³³Akholanga ebilenje bianje okhwanguha nibiilukha shinga ebieshitsusu, yambisanga mubikulu.

³⁴Yanzechesinjia okhulasana, anyalinga amakhono kanje okhulasanila obuyingo bweshibia.

³⁵Iwe OMWAMI Nyasaye, unindanga niumbonia obulindibwo bwayakholile okhuba omukhongo, nako amaaniko kayaniindile obulayi.

³⁶Wayahonokosiye okhurula mukhutiilwa nabasuku banje, ne shindahulwakhwo tawe.

³⁷Ndalondachila abasuku banje nebatiila, shindahuluukhakhwo ta, okhuula olwa ndali nebeerire boosi.

³⁸Ndabarema nibakwa nibakhaywa okhubuukha. Bakwa hasi webilenje bianje nibahulilwe.

³⁹Wambelesia amaani kokhukhupana mwihe, khandi niunyalila okhuhula abasuku banje.

⁴⁰Wakhola abasuku banje okhushiukhana nibanzilukha, niunyalila okhumulula boosi abaasila.

⁴¹Bahaba mbu, bahabinwe, nebutswa owokhubahabina shiyaliho tawe. Bahabila OMWAMI Nyasaye, nebutswa shiyabahulila tawe.

⁴²Ndabatubula shinga olufu lwomuyeka kutuumuulanga, ndabaseenachila shinga amatoyi kokhunjila.

⁴³Iwe wahabina isie okhurula mubusoolo bwabandu, waakhola okhuba omuruchi, okhuruka amahanga, abandu bandalaali nindamanya tawe bulano baakhalabanilanga.

⁴⁴Abarende bambelesinjia oluyali bakholanga aka isie ebalachilisia okhukhola.

⁴⁵Bafwitsnga emioyo, mana barula mungoba tsiabwe nibatechela, nibetsa ewa isie endi.

⁴⁶OMWAMI Nyasaye abetsangaho mwoyo buli lwosi! OMWAMI Nyasaye yetsoomibwe, ouli obwilushilo bwanje; murumbule obukhongo bwa Nyasaye oumboninjia.

⁴⁷Yakholanga okhuhula abasuku banje, nara tsimbia tsiabandu hasi woburuchi bwanje.

⁴⁸Yahonokosinjia okhurula mubasuku banje. Iwe OMWAMI Nyasaye, unyalilanga okhuhula abasuku banje, niumbonia okhurula khubandu beinduli.

⁴⁹Khulweshio, ekhwitsoominjia iwe mumahanga, ndalakhwimbila tsinyimbo tsiokhukhwitsoomia.

⁵⁰Nyasaye ahelesinjia omuruchiwe obuhuli obukhongo, alolosinjia obuheeli oburalilu khumundu wa yaahula, khu Daudi nende abolwibulolwe inziayo.