Read wanga TSITSABULI 21 Bible Online

TSITSABULI 21 - wanga bible

TSITSABULI 21

¹Khumurereesi wetsinyimbo. Itsabuli ya Daudi. Iwe OMWAMI Nyasaye, omuruchi asaangaalile khulwa amaani komuhelesiye, khandi yekhoyile muno khulwobukhoonyibwo!

²Wamuhelesiye akobwikombi bwomwoyokwe, khandi shiwamwimile aka yakhusaba tawe.

³Okhuba omwitsiile nomureerera tsikhabi tsinyinji, omufwalile olusimbi lweitsahabu inzeleleshe khumurwekwe.

⁴Yakhusaba obulamu, nawe nomuhelesia, iwe wamuhelesia obulamu obuyindifu inziayo.

⁵Oluyalilwe nolukhongo khulwa obukhoonyibwo, wamuhelesiye ifuma nende obukhulundu.

⁶Wamukhola okhuba weikhabi muno emiyika chiosi, asaangaalanga muno noli ninaye.

⁷Omuruchi yesikanga OMWAMI Nyasaye wobunyali, khandi khulwa obuheeli oburalilu bwouli Omukhongo Muno, yakharalisibwe.

⁸OMWAMI Nyasaye, olabahamba abasukubo boosi, omukhonokwo musaatsa kulahamba abakhusila.

⁹Olwa ololekha, olabamulula shinga omulilo omululu. OMWAMI Nyasaye alabamulula muburumabwe, nakwo omulilo kulabamulula.

¹⁰Olamulula abolwibulo lwabwe boosi pe, shialatong'akhwo kata mulala owokhubaana babwe tawe.

¹¹Kata nibakaasia okhukhukholela amabi, kata nibaba nibatuta akokhukhusasia iwe, shibalanyala tawe.

¹²Okhuba olabalasa nobuyingobwo, nobelukhasia tsimbilo.

¹³OMWAMI Nyasaye, witsoomibwe khulwa amaaniko! Khuleemba nikhwitsoomia akebikholebio biamakana.