Read wanga TSITSABULI 22 Bible Online

TSITSABULI 22 - wanga bible

TSITSABULI 22

¹Khumurereesi wetsinyimbo, mumayoosi ka “Eshitsusu shiomumabwibwi.” Itsabuli ya Daudi. Nyasaye wanje, Nyasaye wanje, mbushiina niundeshile? Mbushiina noli ehale, nolahulila okhubinda khwanje ta?

²Iwe Nyasaye wanje, ekhuhabilanga eshiteere tulu, nawe shiumbabinanga ta, ekhuhabilanga nende mushilo, nebutswa shienyoolanga obuhuluushi tawe.

³Nebutswa iwe oli omutakatifu, owemekhwa mbu, Abaisiraeli bakhwitsoominjie.

⁴Abakuuka befwe bakhwisikanga iwe, bakhwisikanga, nawe wabahabinanga.

⁵Bakhuhabila iwe, nawe nobahonokosia okhurula mumatinyu, bakhwisika iwe, ne shibafwimbwa omurwe tawe.

⁶Nebutswa isie shiendi eshindu ta, endi butswa inyende, abandu banzeshelelanga nibaanjaya.

⁷Abandolakhwo boosi banzeshelelanga, bakhoomoolelanga tsimoni nibaaresilia emirwe,

⁸nibamboolela bari, “Yeleetanga khu OMWAMI Nyasaye, lekha amuhonie! Lekha amuhonokosie, okhuba niye owayesikanga!”

⁹Nebutswa niwe owachila nindibulwa, olwa ndali neshinuunanga, waniinda obulayi.

¹⁰Okhurula nindibulwa, niwe ouniindanga, niwe Nyasaye wanje, okhurula neshili indaana.

¹¹Shiolasita ehale ninasi ta, okhuba amatinyu kali ahambi, ne shialiho oundi ounyala okhukhoonya tawe.

¹²Abasuku abanji bambotokhaane, abasuku bamaani shinga tsisurusi mushialo shia Bashani.

¹³Baasamanga eminwa chiabwe shinga tsitalanyi, etsihoola nitsienya okhuurandula isie.

¹⁴Amaani kambwelemwo, kambwelemwo shinga amaatsi akasunduulwe hasi. Amakumba kanje koosi kafwonooshe, omwoyo kwanje kufwile shinga ihula isaluulwe.

¹⁵Hamwoyo wanje hasaangalaale shinga olufu, olulimi lwanje nalwo luhandile mushitakhuna. Unzibalile mung'ani yabafu.

¹⁶Omukanda kwabamayanu kumbotokhaane, kumbotokhaane shinga lihitso lietsimbwa. Baakhalaache emikhala khumakhono nende ebilenje.

¹⁷Amakumba kanje koosi kasang'alaale, abasuku banje baahenganga nibanzeshelela.

¹⁸Bakabananga ebifwalo bianje, babilaarananga, nibabikhupila ikha.

¹⁹Nebutswa Iwe OMWAMI Nyasaye, shiolaba ehale ninasi ta! Yitsa bwangu umbabine!

²⁰Umbonie okhurula khulukanga, uhonokosie okhurula khubunyali bwetsimbwa tsino!

²¹Ureesie okhurula muminwa chietsitalanyi, uhonokosie okhurula mutsinzika tsietsisurusi tsimbalaba tsino.

²²Ndalaboolela abashianje akebikholebio, ndalakhwitsoomia imbeli wabwe nemboola endi,

²³“Inywe abamuritsanga OMWAMI Nyasaye, mumwitsoomie! Inywe abolwibulo lwa Yakobo, mumuhelesie oluyali! Inywe abandu ba Isiraeli, mumwinamile!

²⁴Shialechelesinjia abatakha, noho okhwibilila obunyakhani bwabwe ta, shiabakhupilanga omukongo ta, habula ahulilanga okhuhaba khwabwe nabakhoonya.”

²⁵Ndalakhwitsoomia khukebikholebio imbeli womukhung'ano omukhongo. Ndalakhola aka ndetsuba okhukhola imbeli wabakhwinamilanga.

²⁶Abamanani balalia nibekura, abeetsa khu OMWAMI Nyasaye balamwitsoomia. Bakhoya bayindila emiyika chiosi!

²⁷Amahanga koosi kaletsulila nikakalukha khu OMWAMI Nyasaye, tsimbia tsiamahanga koosi tsilamwinamila.

²⁸Okhuba OMWAMI Nyasaye niye omuruchi, arukanga amahanga koosi.

²⁹Abechinjimisi boosi balimwinamila, abandu boosi abafwitsanga balimwinamila, nasi ndalamwinamila olwa eshiliho mwoyo.

³⁰Tsinzibulo tsitsanga tsilimukhalabanila, abandu balitsiboolela amakhuwa ka OMWAMI Nyasaye.

³¹Abashili okhwibulwa baliboolelwa olwa baliibulwa bari, “OMWAMI Nyasaye yahonia abandube.”