Read wanga TSITSABULI 25 Bible Online

TSITSABULI 25 - wanga bible

TSITSABULI 25

¹Itsabuli ya Daudi. Iwe OMWAMI Nyasaye, niwe owesaayanga,

²niwe owa ndisikanga. Umbonie okhurula mutsisoni tsiokhuhulwa, shiolafuchilila abasuku banje okhunzeshelela tawe.

³Toto shiofuchililanga abasuubilanga mwiwe okhuhulwa ta, habula abili abangu bokhukhaya iwe.

⁴Iwe OMWAMI Nyasaye, umanyie tsinjilatsio, niunzechesia okhutsilonda.

⁵Unzechesie okhumenya mubwatielibwo, shichila niwe Nyasaye oumboninjia, niwe owa ndisikanga buli lwosi.

⁶Iwe OMWAMI Nyasaye, yitsulila eshisashio nende obuheelibwo oburalilu, ebia walolesia okhurula khale.

⁷Undeshele obwonooni nende obuyiri bioluraaka lwanje, Iwe OMWAMI Nyasaye, mubuheelibwo oburalilu nende obulayibwo unzitsulile.

⁸Okhuba OMWAMI Nyasaye nomulunjishi khandi nomulayi, yechesinjia abonooni tsinjila tsia bakhoyile okhulondakhwo.

⁹Yemililanga abaholo mubulunjishi, nabeechesia akokhwenyakhwe.

¹⁰Abemililanga mubusuubilwa nende mubuheelibwe oburalilu, OMWAMI Nyasaye yemililanga boosi abalindanga indakanoye, nibalonda amalakoke.

¹¹Iwe OMWAMI Nyasaye, undeshele obwonooni bwanje shinga olwa walaka, shichila nobunji.

¹²Omundu oumuriitsanga OMWAMI Nyasaye niwiina? Niye owa OMWAMI Nyasaye alechesia injila yokhulondakhwo.

¹³Ye mwene alamenya nomulembe, abolwibulolwe balalaamilwa eshialo.

¹⁴OMWAMI Nyasaye abisulilanga abamuriitsanga amakhuwake, nende okhubachetsiyia khukeindakanoye.

¹⁵Buli lwosi ndiletanga khu OMWAMI Nyasaye okhuukhoonya, naye yahonokosinjia okhurula mumatinyu.

¹⁶OMWAMI Nyasaye, shiukhanila mana ukholele aketsimbabasi, shichila endi sienyene khandi endi oubula amaani tawe.

¹⁷Huluusia obunyakhani bwomwoyo kwanje, niumbonia mumatinyu kanje.

¹⁸Paarakhwo akobusandibwi nende obunyakhani bwanje, mana undeshele obwonooni bwanje.

¹⁹Lolakhwo shinga olwa abasuku banje bali abanji, lolakhwo shinga olwa baasila!

²⁰Uniinde niumbonia, shiolalekha baahula ndafwimbwa omurwe ta, shichila ekhwilushilanga iwe okhwihonia.

²¹Obulayi nende obwatieli bianje bikhoya bianiinda, shichila niwe owa ndisikanga.

²²Iwe OMWAMI Nyasaye, Honia abandubo ba Isiraeli, obahonie okhurula mubunyakhani bwabwe bwosi.