Read wanga TSITSABULI 27 Bible Online

TSITSABULI 27 - wanga bible

TSITSABULI 27

¹Itsabuli ya Daudi yemba OMWAMI Nyasaye niye obulafu bwanje khandi obuhonia bwanje, shindalaria omundu yesi yesi tawe. OMWAMI Nyasaye yanindanga okhurula mububi bwosi, shindalaria eshindu tawe.

²Olwa abandu abamayanu baseera nibateema okhunzira, besichirala nibakwa.

³Kata omukanda kwelihe kwosi nikumbotokhana shindalaria eshindu tawe. Kata abasuku nibaaseera, ndalatsiilila okhwisika OMWAMI Nyasaye.

⁴Shiliho eshindu shilala eshia ndaasabile OMWAMI Nyasaye, ne nishio eshia ndalatsiililila okhukhaaba shionyene, mbu, emenyenye munzu ya OMWAMI Nyasaye emiyika chiosi, ndikhoyelenje obulayibwe nende okhusaba obwimilisibwe.

⁵Mubise biamatinyu, alambisa, alaniinda obulayi muhekaluye, alambisa khulwanda khwikulu hekulu.

⁶Kho ndalahula abasuku banje abambotokhaane. Ndalemba nomwoyo kwobusaangaafu nemala emisango muhekaluye. Ndilimba ninditsoomia OMWAMI Nyasaye.

⁷Iwe OMWAMI Nyasaye, umbulile olwa ekhuhabila! Umbeele tsimbabasi mana umbulile.

⁸Olwa waboola ori, “Mwitse munzinamile,” ndakhukalusia endi, “OMWAMI Nyasaye, ndaletsa.”

⁹Shiolebisa okhurula khwisie tawe. Shiolaasinyishila ta, Shiolalonda omukhalabaniwo ta, niwe omuhabini wanje, shiolandekha, kata okhuusukuna tawe. Iwe Nyasaye, niwe omuhonia wanje.

¹⁰Kata papa nende mama nibandekha, iwe OMWAMI Nyasaye olaniinda.

¹¹Iwe OMWAMI Nyasaye, nzechesia eshia wenya mbu, ekhukholele, mana unzimilile khunjila tsindayi, shichila endi nabasuku abanji.

¹²Shiolandekha ndakwa mumakhono kabasuku banje, abaaseeranga nobubeeyi nibaasiomela tawe.

¹³Emanyile mbu, ndalalola obulayi bwa OMWAMI Nyasaye mubulamu buliho buno.

¹⁴Osuubile mu OMWAMI Nyasaye, obe nobusuubili, shiolafwa omwoyo ta, osuubile mu OMWAMI Nyasaye.