Read wanga TSITSABULI 28 Bible Online

TSITSABULI 28 - wanga bible

TSITSABULI 28

¹Itsabuli ya Daudi yemba Iwe OMWAMI Nyasaye, ekhuhabila iwe, rechelesia okhuhaba khwanje! Ne nolahulila okhubaba khwanje ta, ndalaba mulala khubandu abatsia emakombe.

²Umbulile olwa ekhuhabila nindenya obukhoonyi, olwa engalikha amakhono kanje nikahenjile Ihekaluyo indakatifu.

³Shiolambelesia eshinyasio halala nabamayanu, abakholanga obwonooni, abandu ababoolelanga abashiabwe akomulembe tawe. Nebutswa obumayanu nibwo obuli mumioyo chiabwe.

⁴Obahelesie eshinyasio khulwa ebikhole biabwe bia bakhola biosi, khulwa obwonooni bwabwe bwa bakhola, obahelesie eshinyasio khulwa ebikhole biabwe biabakhola biosi. Obahelesie eshinyasio eshibakwaniile.

⁵Shibatebangakhwo aka OMWAMI Nyasaye yakhola, noho kata akayakaasia ta, khulweshio alabahelesia eshinyasio nabasasia emiyika chiosi.

⁶OMWAMI Nyasaye yetsoomibwe, shichila yahuliile okhuhaba khwanje.

⁷OMWAMI Nyasaye niye amaani kanje khandi eshikhumba shianje, esuubilanga muye. Yakhoonyanga niyasaangaasia, emwitsoominjia nende tsinyimbo tsiobusaangaafu.

⁸OMWAMI Nyasaye niye amaani kabandube, niye obwilushilo bwokhuhonia omuruchiwe wa yaahula.

⁹OMWAMI Nyasaye, honia abandubo, mana ohelesie abali abobo tsikhabi. Obe omwayi wabwe, mana obaliindenje emiyika chiosi.