Read wanga TSITSABULI 31 Bible Online

TSITSABULI 31 - wanga bible

TSITSABULI 31

¹OMWAMI Nyasaye, ndilushilanga khwiwe khulwa obulindwi, shiolandekha ndafwimbwa omurwe tawe. Oli Nyasaye wobulunjishi. Ekhusaaya mbu, umbonie!

²Umbulile! Mana umbonie bulano! Obe obwilushilo bwanje bwokhuniinda, khandi obe olukoba lwanje lwokhumbonia.

³Niwe obwilushilo bwanje, khandi niwe olukoba lwanje. Unzibaalile mana unyimilile shinga olwa walaka.

⁴Umbonie okhurula mumibero chiamabiswi chia ndarekwa, shichila niwe obwilushilo bwanje.

⁵Ndireetsanga mubulindibwo. OMWAMI Nyasaye, olambonia, shichila oli Nyasaye omwisiikwa.

⁶Wasila abenamilanga abanyasaye bobubeeyi, nebutswa isie esuubilanga mwiwe.

⁷Ndasaangaala nindikhoya khulwa obuheelibwo oburalilu, shichila ololanga obusandibwi bwanje, khandi omanyile obutinyu bwanje.

⁸Shiwafuchilila abasuku banje okhundiila ta, waakhola isie omulekhuule okhutsia eha ndienya.

⁹Iwe OMWAMI Nyasaye, umbeele tsimbabasi, shichila endi mubutinyu, tsimoni tsianje tsinzuunanga khulwa okhulila, emalile okhuchoonya!

¹⁰Eshibeela shinjoonyiye, nakhwo okhwikhuula khwimbichitiye obulamu bwanje, obunyakhani bwanje bwayakholile okhuba omuteshele, kata amakumba kanje kafwokooye.

¹¹Abasuku banje, okhushila muno abamenyani banje baanyekanga, boosi abaamanya baaritsanga. Olwa bandolanga khumuhanda, banzilukhanga.

¹²Buli mundu yanzibilila shinga omundu wafwa, endi shinga eshindu shiasukunwa.

¹³Embulilanga abasuku abanji nibaamoonya, oburi bumbotokhaane bakaasinjia okhusaalisia, nibenya okhunzira.

¹⁴Nebutswa iwe OMWAMI Nyasaye, niwe owa ndisikanga, Niwe Nyasaye wanje.

¹⁵Endi mubuliindibwo buli lwosi, umbonie okhurula mumikhono chiabasuku banje, nende okhurula mubasaandinjia.

¹⁶Undolele tsimbabasi isie omukhalabaniwo, okhubirira mubuheelibwo oburalilu, umbonie.

¹⁷Iwe OMWAMI Nyasaye, ekhuhabilanga, shiolandekha ndafwimbwa omurwe tawe. Abonooni bakhoya bafwimbwa emirwe, bakhoya batsia Emakombe nibafwimbilwe emirwe.

¹⁸Holelesia ababeeyi, abali abeisunga khandi abeinduli, abalechelesinjia abalunjishi.

¹⁹Ehukanga butswa khulwa ebindu ebilayi, ebiobiishilanga abakhuriitsanga iwe. Buli mundu amanyile shinga olwa oli omulayi, khandi shinga olwa oliindanga obulayi abakhwisikanga iwe.

²⁰Obabisanga habundu halayi aho oli, okhurula khumireko chiabandu, obabisanga mubwiyangu obulayi, okhurula khumanyeko kabasuku babwe.

²¹OMWAMI Nyasaye yetsoomibwe, yalolesiye obuheelibwe oburalilu khwisie munjila yamakana, olwa ndabeele nembotokhaanwe khandi neseerirwe.

²²Ndali neriire nembaranga mbu, yali niyanoondile okhurula aha ali. Nebutswa yahulila okhuhaba khwanje, olwa ndamuhabila mbu, yahabine.

²³Mumuheele OMWAMI Nyasaye, inywe abandube abesiikwa. OMWAMI Nyasaye aliindanga abandu abesiikwa, nebutswa abechinjimisi abahelesinjia eshinyasio shibakhoyeele.

²⁴Inywe mwesi abanaayilanga mu OMWAMI Nyasaye, mutinye muume tsikholo.