Read wanga TSITSABULI 33 Bible Online

TSITSABULI 33 - wanga bible

TSITSABULI 33

¹Inywe mwesi abali abalunjishi, mukhupe tsingalakala, shichila OMWAMI Nyasaye akholile, inywe mwesi abamuhulilanga, mumwitsoomie.

²Mwitsoomie OMWAMI Nyasaye nimukhupa litungu, mumukhupile indongooli namayoosi amalayi.

³Mumwimbile olwimbo oluyia, mukhupe obukhana obulayi nimuchinjile olukhu lwobusaangaali.

⁴Likhuwa lia OMWAMI Nyasaye neliatoto, nachio emilimochie chikholungwa mubwisiikwa.

⁵OMWAMI Nyasaye aheelanga obulunjishi nende obukhalachi bwa habwene. Eshialo shiosi shietsulamwo obuheelibwe oburalilu.

⁶Likulu lialongwa okhurulana nende likhuwa lia OMWAMI Nyasaye yaboola, eliuba, omwesi, nende tsing'ining'ini bialongwa okhurulana nende amakhuwa ka yaboola.

⁷Yakhung'asia amaatsi komunyanza nakara halala, yekalila tsisiba munyanza hasi.

⁸Lekha eshialo shiosi shihelesie OMWAMI Nyasaye oluyali, lekha abandu bamenya khushialo boosi bamuhelesie oluyali.

⁹Olwa yaboola, eshialo shiosi shialongwa, yalaka, mana buli shindu nishilolekha.

¹⁰OMWAMI Nyasaye akholanga obuchetsiyi bwamahanga okhuba bwa butswa. Abayinjilanga okhukhola aka beenya.

¹¹Nebutswa aka akaasiye kayindilanga emiyika chiosi, amachoomoke kamenyangaho obushia nobushia.

¹²Nelieikhabi lihanga lia Nyasaye ali OMWAMI Nyasaye walio. Nabeikhabi aba yaahula okhuba abeebe!

¹³OMWAMI Nyasaye ahenganga hasi nali mwikulu, mana alola oluyia lwosi lwabandu.

¹⁴Okhurula ewa aruchilanga, ahenganga hasi, khu boosi abamenyanga khushialo.

¹⁵Akaasinjia amapaaro kabwe koosi, mana amanya buli shindu shia bakhola.

¹⁶Omuruchi shiahulanga lihe khulwa obunji bwabalwanibe ta, omulwani shiahulanga khulwa amaanike omwene tawe.

¹⁷Tsifarasi shitsinyala okhukhola ohule ta, amaani katsio amanji shikanyala okhuhonia tawe.

¹⁸OMWAMI Nyasaye ahenganga khubamuriitsanga, nende abenabo abesikanga obuheelibwe oburalilu.

¹⁹Abahoninjia okhurula mukhufwa, mana abalinda baba mwoyo mutsinyanga tsieinzala.

²⁰Khureetsanga obunaayi bwefwe mu OMWAMI Nyasaye, niye omukhoonyi wefwe khandi eshikhumba shiefwe.

²¹Toto emioyo chiefwe chikhoyelanga muye, shichila khwisikanga eliiralie litakatifu.

²²Iwe OMWAMI Nyasaye, obuheelibwo oburalilu bukhoya bwaba ninefwe, shinga olwa khunayila mwiwe.