Read wanga TSITSABULI 34 Bible Online

TSITSABULI 34 - wanga bible

TSITSABULI 34

¹Ndaletsoomia OMWAMI Nyasaye buli lwosi, Ndalatsiililila okhumwitsoomia buli lwosi.

²Ndaletsoomia OMWAMI Nyasaye khukayakhola. Abasandibungwa bakhoya bahulilekhwo mana batsatsahala.

³Khwitsoomie obukhongo bwa OMWAMI Nyasaye, leshe khwitsoomie eliiralie fwesi.

⁴Ndahabila OMWAMI Nyasaye, naye niyambulila, niyambonia mu koosi akariisinjia.

⁵Mumuhenje inywe abasandibungwa, ne shimulabakhwo netsisoni tawe.

⁶Omundu omutakha yahabila OMWAMI Nyasaye, naye namuhulila, yamuhonia okhurula mumatinyuke koosi.

⁷Omumalaika wa OMWAMI Nyasaye afumbelelanga naliinda boosi abariitsanga OMWAMI Nyasaye, mana abahonia okhurula mumatinyu.

⁸Khabilisie abeene, mulole shinga olwa OMWAMI Nyasaye ali omulayi, noweikhabi omundu wilushilanga khuye khulwobukhoonyi.

⁹Muhelesie OMWAMI Nyasaye oluyali inywe abandube mwesi, ne abamuriitsanga shibatambanga eshindu shiosi tawe.

¹⁰Tsitalanyi tsimbuukha tsihonganga inzala nitsikhayilwe eshia tsilia, nebutswa abenamilanga OMWAMI Nyasaye shibatambanga eshindu shiosi shiosi tawe.

¹¹Inywe abaana banje, mwitse muhulile akemuboolela, nasi ndalamwechesia okhuhelesia OMWAMI Nyasaye oluyali.

¹²Wakhaba niwenyangakhwo okhuba nobulamu obulayi, wakhaba niwikombangakhwo okhumenya emiyika eminji nende obulamu obulayi?

¹³Kho lekha okhuboolanga amabi, khandi oleshe okhukaatia abandu.

¹⁴Lekha amabi, okhole akali amalayi. Khaaba omulembe nomwoyokwo kwosi.

¹⁵OMWAMI Nyasaye aliindanga abalunjishi, amarwike kahulilanga okhuhaba khwabwe.

¹⁶OMWAMI Nyasaye ahenganga nafukula bakholanga obumayanu, kho mbu, olwa bafwa bebililwe bwangu.

¹⁷Olwa abalunjishi bahabila OMWAMI Nyasaye, abahulilanga nabahonokosia okhurula mumatinyu kabwe koosi.

¹⁸OMWAMI Nyasaye abetsanga ahambi khubemioyo chiabwe chifwile, nahonia abemioyo chiyiengushile.

¹⁹Omundu omulunjishi anyoolanga amatinyu amanji, nebutswa OMWAMI Nyasaye amuhoninjia mukoosi.

²⁰OMWAMI Nyasaye amuliindilanga elala, kata elala khumakumbake shiliafunikhakho tawe.

²¹Obubi buliira abamayanu, abasila obulunjishi balinyoola eshinyasio.

²²OMWAMI Nyasaye alahonia abakhalabanibe, abelushilanga khuye khulwa obuliindwi shibaleerwa tawe.