Read wanga TSITSABULI 35 Bible Online

TSITSABULI 35 - wanga bible

TSITSABULI 35

¹Iwe OMWAMI Nyasaye ofukule abayinganinjia, khandi olwane abaalwananga isie!

²Bukula ingabo nende eshikhumba, mana witse uhonokosie.

³Bukula lisaakhalio nende lifumolio khulwokhuyinga abasuku banondachilanga. Suubisia mbu, olambonia.

⁴Lekha abateemanga okhunzira bahulwe nibafwimbibwa emirwe, lekha abangasilinjia amabi bashiukhasibwe nibakoyaana.

⁵Bakhoya baaba shinga omukhuutsi kwomuyeka kutuumuula, olwa omumalaika wa OMWAMI Nyasaye abalondakasia.

⁶Injila yabwe ikhoya yelima, khandi yaarerekha, olwa omumalaika wa OMWAMI Nyasaye abalondachila nabakhupa.

⁷Baareka nomubero obulabakhwo neshifune shiosi shiosi ta, khandi bayaba obuko oburambi mbu isie engwemwo mana bandiile.

⁸Nebutswa baletsukhana butswa nibamululwa, omubero kwa bareka kulabatiila abeene, khandi abeene balakwamwo nibamululwa.

⁹Nolwa ndalasaangaala khulwa OMWAMI Nyasaye, Ndalekhoya okhuba yamboniye.

¹⁰Ndalaboolela OMWAMI Nyasaye nomwoyo kwanje kwosi endi, “Abulaho oundi shinga iwe, iwe oliindanga abateshele okhurula khubali namaani, oliindanga abatakha okhurula khubabasandinjia.”

¹¹Abandu abamayanu bakholanga obuloli nibafukula isie, khandi banzinjililanga itookho khukandalamanyile tawe.

¹²Baarunganga amabi khulwa amalayi kanje, nasi omwene endoonyile nefwile omwoyo.

¹³Nebutswa olwa bali abalwale, isie ndefwala amakunia okhumanyisia mbu, embeeleele, ndahonga inzala nindinama hasi nebasaayila,

¹⁴shinga ousaayila omwitsa noho omwikho wanje. Ndabotokhana nindikhuula shinga olwomundu yekhuulanga nyinamwana.

¹⁵Nebutswa olwa ndali mumatinyu, batsatsahala, khandi nibakhung'ana okhunzeshelela. Abandu ba ndalamanyile ta baakhupa, khandi abulaho owabeekalila okhuukhupa tawe.

¹⁶Shinga olwa abandu banyokhosinjia omulema, nolwa bakhwayulila ameeno bario.

¹⁷Iwe OMWAMI Nyasaye, olatsiililila okhuhenga okhuula liina? Umbonie okhurula mukhuseera khwabwe niurusia mutsitalanyi etsio!

¹⁸Nolwa nasi ndalakhukalusilia orio mumukhung'ano omukhongo kwabandubo, ndalakhwitsoomia imbeli wabwe boosi.

¹⁹Shiolafuchilila abasuku banje ababeyi abo okhusaangaalila okhuhulwa khwanje tawe. Khandi shiolafuchilila abaasila butswa abo okhunzeshelela, shichila mbu, endi mushibeela tawe.

²⁰Shibabolanga akomulembe ta, habula bakhootsanga obubeeyi khubandu bachama okhumenya mumulembe.

²¹Banjiikhanga amakhuwa, nibaboola bari, “Khulutsi akokholile.”

²²Iwe OMWAMI Nyasaye, olutsi akatsana ako, khulweshio OMWAMI Nyasaye, shiolaholeela ta, shiolaba ehale ninasi tawe.

²³OMWAMI Nyasaye wanje, buukha umbabine, iwe Nyasaye wanje, yitsa uhenjekhwo mumatinyu kanje.

²⁴Iwe OMWAMI Nyasaye, Nyasaye wanje, umbiniekhwo eshikha, okhulondana nende obulunjishibwo, ne shiolafuchilila abasuku banje okhunzeshelela tawe.

²⁵Shiolabafuchilila okhuboola mumioyo chiabwe bari, “Khunyoolile akakhwikombilenje, yako niko akakhwenyilenje,” tawe.

²⁶Lekha abasaangaalilanga amatinyu kanje, bafwimbwe emirwe nibakoyasibwa, nabo abechinjimisi bahafibwe tsisoni nibafwimbwa emirwe.

²⁷Nebutswa oleshe abekombanga mbu, isie embule eshikha, bekhoye nibatsatsahala buli lwosi, nibaboola bari, “OMWAMI Nyasaye nomukhongo, achamisibungwa namakhuwa amalayi komukhalabaniwe.”

²⁸Nasi ndalaboola khukobulunjishibwo, nekhwitsoomia tsinyanga tsiosi.