Read wanga TSITSABULI 36 Bible Online

TSITSABULI 36 - wanga bible

TSITSABULI 36

¹Obwonooni buboolanga nomundu omumayanu mumwoyokwe mukari, omundu oyo akhayanga okhuhulila OMWAMI Nyasaye khandi shiamuriitsanga tawe.

²Yechinjimisinjia omwene napaara mbu, Nyasaye shialamanya obwonoonibwe mana amukhalachile eshiina tawe.

³Amakhuwa kaboolanga nakobubatsa nende obukaati, yalekha okhukhola akobuchesi nende okhukhola amalayi,

⁴Nakonile ayililisinjia okhukhola amakhuwa amabi, shiakholangakhwo eshindu eshilayi shiosi shiosi ta, khandi shialobanga eshindu eshibi tawe.

⁵Iwe OMWAMI Nyasaye, obuheelibwo oburalilu buulanga mwikulu, obwisikwabwo buulanga mumaleesi.

⁶Obulunjishibwo noburambi shinga ebikulu, obukhalachibwo bwahabwene nobwiyinikhu shinga olusiba lwomunyanza olukhongo. Niwe ouliindanga abandu nende tsisolo.

⁷Iwe Nyasaye, obuheelibwo oburalilu nobulayi muno! Abaana babandu baliindungwa obulayi mushinikha shietsimbahatsio.

⁸Balitsanga khubiokhulia ebinji bili munzuwo, obanywesinjia amaatsi okhurula mumwalo kwobulayibwo.

⁹Niwe eshinoko shiobulamu bwosi, Mubulafubwo, khulolanga obulafu,

¹⁰Tsiililila okhuheela nende obuheelibwo oburalilu abakhumanya iwe, khandi otsiililile okhukholela abalunjishi amalayi.

¹¹Shiolafuchilila abandu abechinjimisi okhuseera isie, kata abamayanu okhunondachilila tawe.

¹²Lolakhwo shinga olwa abandu abamayanu bakwile, bakwisiibwe hasi, shibanyala okhubuukha tawe.