Read wanga TSITSABULI 37 Bible Online

TSITSABULI 37 - wanga bible

TSITSABULI 37

¹Shiolahendela abamayanu ta, shiolakholela abonooni imbalikha ta!

²Shichila balaniala bwangu shinga obunyasi, nibafululukha shinga amasaafu.

³Okholenje amalayi nosuubila mu OMWAMI Nyasaye Kho mbu, omenye mushialo noliindwa obulayi.

⁴Saangaalila mu OMWAMI Nyasaye, ne alakhuhelesia ebiomwoyokwo kwikomba.

⁵Wihaane omwene khu OMWAMI Nyasaye, osuubilenje muye naye alakhukhoonya.

⁶Alakhola obulunjishibwo bwashe shinga eliuba lieshiteere.

⁷Wisumilisie noliindilila OMWAMI Nyasaye okhukhukhoonya, shiolaria abayindihala, kata abamakhuwa kabwe amabi katsiilililanga obulayi tawe.

⁸Lekha oburima bube nolekhana nende oburaasi, lekhana ninabio, shichila bikhuchoominjia butswa khubwonooni.

⁹Abamayanu balasasibwa, nebutswa abesikanga OMWAMI Nyasaye balabukula eshialo shia OMWAMI Nyasaye yabalaka.

¹⁰Abamayanu balarusibwaho butswa mubise bituutu, kata nobakhaaba aha ababetsanga, shibalabaho tawe.

¹¹Nebutswa abaholo balalaamilwa eshialo, balekhoyela amalayi amanji.

¹²Abamayanu batutanga okholela abalunjishi amabi, bakhwayulilanga abalunjishi ameeno.

¹³Nebutswa OMWAMI Nyasaye atsekha abamayanu abo, shichila amanyile mbu, balasasibwa bwangu.

¹⁴Abamayanu batsomola tsinganga tsiabwe nibenamia obuyingo bwabwe, khulwokhwira abamanani nende abatakha, khulwokhusinza abakholanga akobulunjishi.

¹⁵Nebutswa tsinganga tsiabwe tsilabeera abeene, obuyingo bwabwe nabwo bulafunakwa.

¹⁶Ebindu bitiiti ebiomulunjishi ali ninabio bishila obuyinda obunji obwomumayanu ali ninabwo.

¹⁷Okhuba OMWAMI Nyasaye alarusiaho amaani kabonooni, nebutswa OMWAMI Nyasaye alaliindanga abalunjishi.

¹⁸OMWAMI Nyasaye yamanya obuyindifu bwabandu ababula eshikha, khandi obulaame bwabwe shibulihwaho tawe.

¹⁹Shibalifwimbwa emirwe mutsinyanga tsiamasila ta, khandi balekura mutsinyanga tsieinzala.

²⁰Nebutswa abamayanu balafwa, nabo abasuku ba OMWAMI Nyasaye balabungulukha shinga ebimuli, balakhamuukha shinga omwosi.

²¹Abandu abamayanu beholanga obulakalusia ebia beholile ta, nebutswa abalunjishi nabahaani.

²²Aba OMWAMI Nyasaye ahelesia ikhabi balalaamilwa eshialo, nebutswa abalaamila eshilaamo shiobubi balasasibwa.

²³OMWAMI Nyasaye yemililanga abandu munjila ya bakhoyile okhuchendelamwo, khandi aliindanga abamuchamisinjia.

²⁴Kata nibakwa, shibalatong'aho ta, okhuba OMWAMI Nyasaye alababuusia.

²⁵Ndali omubuukha, ne bulaano ndakofula, nebutswa eshili okhulolakhwo OMWAMI Nyasaye naleshile abandu abalunjishi, kata abaanabe nibasabanga eshiokhulia tawe.

²⁶Abalunjishi bahananga ebindu nibakhoonya abashiabwe buli lwosi, abaana babwe nabo nabetsikhabi.

²⁷Wihanye okhurula mububi, nokhola akali amalayi, ne olamenya emiyika nemiyika.

²⁸Okhuba OMWAMI Nyasaye yaheela obukhalachi bwa habwene, ne shiyebalanga abandube abesiikwa tawe. Abalunjishi balaliindungwa obushia nobushia, nebutswa abaana babamayanu balasasibwa.

²⁹Abalunjishi balalaamilwa eshialo, ne balamenyamwo emiyika chiosi.

³⁰Amakhuwa kabandu abalunjishi nakobuchesi, ne buli lwosi bakhalakanga ebiina habwene.

³¹Baliindanga amalako ka Nyasayewe mumioyo chiabwe, ne shibakarulangakhwo tawe.

³²Abandu abamayanu bakoneshelanga abalunjishi, nibakhaaba okhubeera.

³³Nebutswa OMWAMI Nyasaye shialabalekha mubunyali bwomusuku wabwe, kata shialafuchilila mbu olwa bakhalachilwa eshiina, shibafwile tawe.

³⁴Ore obunaayibwo mu OMWAMI Nyasaye nolinda amalakoke, naye alakhuchinguula nakhuhelesia eshialo, nawe olalola abamayanu nibamululwa.

³⁵Ndalolakhwo omundu omumayanu owali omululu wokhuriisia, yali yaraabaala shinga omusaala kwomusiita kwa Lebanoni.

³⁶Nebutswa olunyuma ndabiraho, ne shiyaliho ta, ndamukhaaba, nebutswa shindamunyoola tawe.

³⁷Henga olole omundu omulayi khandi omulunjishi, shichila omundu womulembe yebulanga abandu abanji.

³⁸Nebutswa abonooni balasasibwa boosi pe, ne abolwibulo lwabwe balasasibwa.

³⁹Nebutswa OMWAMI Nyasaye ahoninjia abalunjishi, khandi abaliindanga mutsinyanga tsiamatinyu.

⁴⁰Abahabinanga nabahonokosia, abahoninjia okhurula khubabi, shichila bamwilushilanga.