Read wanga TSITSABULI 38 Bible Online

TSITSABULI 38 - wanga bible

TSITSABULI 38

¹Iwe OMWAMI Nyasaye, shiolahalabila muburumabwo ta! Khandi shiolambelesia eshinyasio mukhusinyikhakhwo tawe.

²Okhuba ebisele biobuyingobwo bifumiire, ungwisye hasi obululu.

³Omubili kwanje kusaaliile obululu khulwoburumabwo, omubili kwanje kwosi nomulwale khulwobwonooni bwanje.

⁴Obumayanu bwanje bufunaache omurwe kwanje, obwonooni bwanje buusitoheele muno.

⁵Amakonzo kanje kabolanga nikahunya, khulwobusilu bwanje.

⁶Ndakotibwa mana nindiinamibwa muno, Ehonganga nindikhuula eshiteere tulu.

⁷Inda yanje iyiile pia, omubili kwanje kusaaliile kwosi.

⁸Enjoonyile nendubushila elala, eshenyanga khulwa obutinyu buli mumwoyo kwanje.

⁹OMWAMI Nyasaye, omanyile aka ndikombanga, omanyile okhushenya khwanje khwosi.

¹⁰Omwoyo kwanje kuhendanga khandi amaani kanje kahwele, natsio tsimoni tsianje tsilolanga amaweliweli.

¹¹Abetsa banje nende abamenyani banje banziluushe khulwa amakondo kanje. Kata abomunzu yefwe yeene banzilukhanga.

¹²Abayimanga okhunzira, bareka emibero chiabwe, abenyanga okhusaalisia, basiomanga okhumalilana, shibachweyanga okhututa amabi khwisie tawe.

¹³Nebutswa isie endi shinga owekala amarwi, shiembulilanga ta, khandi endi shinga omundu oulaboolanga tawe.

¹⁴Toto endi shinga omundu ulahulilanga ta, khandi oulanyala okhuyingana tawe.

¹⁵Iwe OMWAMI Nyasaye, niwe owa ndisikanga, iwe OMWAMI Nyasaye wanje, niwe oulambabina.

¹⁶Ekhusaaya mbu shiolafuchilila abasuku banje okhusaangaalila amatinyu kanje ta, khandi shiolabafuchilila okhwiyitsiala olwa ndisichirala nengwa tawe.

¹⁷Endi okhukwa, enzuunungwa buli lwosi.

¹⁸Ndiyama obumayanu bwanje, embeelelela obwonooni bwanje.

¹⁹Abasuku banje nabamaani, nabo abaasila halali eshikha ta, nabanji muno.

²⁰Abaakholelanga amabi, khulwa amalayi kekholanga, baafukulanga isie shichila ekholanga akali amalayi.

²¹Iwe OMWAMI Nyasaye, shiolandekha ta! Iwe Nyasaye wanje, obe ahambi ninasi!

²²Iwe OMWAMI Nyasaye, ouli omuhonia wanje, wanguyilisie okhumbabina.