Read wanga TSITSABULI 39 Bible Online

TSITSABULI 39 - wanga bible

TSITSABULI 39

¹Ndaboola endi, “Ndalechendelesia obulayi, mana endeshe okhuboola amakhuwa amabi, ndalasunia omunwa kwanje, olwa abandu ababi baba nibali ahambi ninasi.”

²Ndaholeela nindalaboolakhwo likhuwa, kata okhuboolakhwo lilayi liosi liosi tawe! Nebutswa obunyakhani bwanje bwameeta okhuba obubi muno!

³Omwoyo kwanje nikuyia mushilifu pia, shinga olwa ndatsiililila okhupaara, nolwa ndameeta okhunyakhana muno, mana omwene nemboola endi,

⁴“OMWAMI Nyasaye, umanyiekhwo okhumalilikha khwanje, khandi umanyiekhwo obunji bwemiyika chianje, umanyiekhwo mbu ndilifwa liina?

⁵Lola, iwe wembichitia obulamu bwanje, kata obuyindifu bwanje shineshindu imbeliwo tawe. Toto mwene buli mundu ali shinga omuya butswa!

⁶Toto mwene buli mundu abiranga shinga eshinikha! Toto mwene banyakhanilanga amakhuwa kabutswa. Omundu abunjikhanga obuyinda nalamanya oulibubukula tawe!

⁷Ne bulano OMWAMI Nyasaye, enindanga shiina? Ndalara obunaayi bwanje mwiwe.

⁸Umbonie okhurula mubwonooni bwanje bwosi, shiolafuchilila abayingwa okhunzeshelela tawe!

⁹Isie shindalaboolakhwo liosi liosi ta, shichila niwe oukholile ako.

¹⁰Urusiekhwo eshinyasioshio shino. Endi ahambi okhufwa khulwa amakhupache kamakhonoko.

¹¹Ohelesinjia abandu eshinyasio khulwa okhubahalabila, khandi osasinjia aka khwachama shinga olwa inguyi yisasinjia ebia yachama. Toto mwene buli mundu nomuya butswa!

¹²Iwe OMWAMI Nyasaye, hulila okhusaaya khwanje, orecheresie okhuhaba khwanje. Shiolalekha okhumbabina olwa endila amasika tawe. Okhuba endi omucheniwo oubira, khandi endi omuhuyi shinga olwa abakuuka banje bali abahuyi.

¹³Undeshekhwo, mbula ndanyoola obuhuluushi, olwa emba neshili okhufwa!”