Read wanga TSITSABULI 40 Bible Online

TSITSABULI 40 - wanga bible

TSITSABULI 40

¹Ndesimilisia nehabila OMWAMI Nyasaye okhumbabina, naye niyarecheresia, nahulila okhuhaba khwanje.

²Mana niyakhwesa niyarusia mubuko bwolumbe, niyarusia mulutende lwamatoyi, niyarenjekha khulwanda niyaralisia.

³Yanzechesia olwimbo oluyia, nilwo olwokhwitsoomia Nyasaye wefwe, abandu abanji balalola nibaria, nabo balasuubilila OMWAMI Nyasaye.

⁴Noweikhabi omundu owisikanga OMWAMI Nyasaye, ouletsokanga mubechinjimisi, kata okhusanjilana nende abenamilanga abanyasaye bobubeeyi tawe.

⁵Iwe OMWAMI Nyasaye wefwe, ebikhole biawakhukholela nebinji muno, wakhukaasilia amakhuwa amanji khandi akamakana, niwiina ounyala okhuchelaasibwa ninawe? Shienyala okhubasia biosi ta, nebinji biamakana.

⁶Iwe shiwenyanga emisango nende ebihaanwa ta, shiosabanga emisango echihaanilwe khushimalo shiemisango, kata emisango chiokhuyiniaho obwonooni ta, habula wambelesia amarwi akokhuhulila amalakoko.

⁷Niko akachila nemboola endi, “Endi hano, ameebaaloko khwisie kali mushitabu shiamalako.

⁸Iwe Nyasaye wanje, esaangaalanga okhukhola akokhwenyakhwo, embiikhanga amechesioko mumwoyo kwanje.”

⁹OMWAMI Nyasaye, ndarumbula amakhuwa amanji akobuhoniabwo, mumukhung'ano kwabandubo boosi. Omanyile mbu, shindakhaleshe okhukaboola tawe.

¹⁰Shindaabisakhwo amakhuwa kobuhonia mumwoyo kwanje ta, buli lwosi emboolanga khumakhuwa kobwisiikwabwo nende obuhabinibwo. Ndaboolile mumukhung'ano kwabandubo boosi amakhuwa kobwisiikwabwo nende obuheelibwo oburalilu.

¹¹OMWAMI Nyasaye emanyile mbu shiolalekhakhwo okhundolela eshisa ta, obuheelibwo nende obwisiikwabwo bilaniindanga obulayi buli lwosi.

¹²Embotokhaanwe nende amasila amanji, akandalanyala okhubasia ta, obwonooni bwanje nobunji muno, bundimbiye tsimoni, obwonooni obwo bushila liswi liokhumurwe kwanje, nakwo omwoyo kwanje kufwile.

¹³OMWAMI Nyasaye, nachama umbonie! Iwe OMWAMI Nyasaye, yanguyilisia okhumbabina!

¹⁴Abenyanga okhunzira bafwimbwe emirwe, khandi bakoyasilibwe elala, abasaangaalilanga okhunyakhana khwanje bashiukhasibwe khandi bafwimbwe emirwe.

¹⁵Abangokonyelanga bakhoya bafwimbwa emirwe khulwa okhuhulwa khwabwe.

¹⁶Ekhusaaya mbu, abakhukhaabanga bekhoye nibasaangaalila mwiwe, nabo abaheela obuhoniabwo baboolenje buli lwosi bari, “OMWAMI Nyasaye nomukhongo!”

¹⁷Isie endi omumanani khandi omutakha, nebutswa OMWAMI Nyasaye yanzitsulilanga. Iwe Nyasaye wanje, niwe omuhabini wanje, khandi omuhonia wanje. Shiolashinda okhwitsa okhumbabina tawe!