Read wanga TSITSABULI 42 Bible Online

TSITSABULI 42 - wanga bible

TSITSABULI 42

¹Shinga olwa eshitsusu shiikombanga amaatsi amanyifu, nolwa omwoyo kwanje kukhwikombanga iwe Nyasaye.

²Ehalaashe khulwa iwe Nyasaye ouliho mwoyo. Ndiliula liina aha oli ndakhulolakhwo nekhwinamila?

³Endilanga eshiteere neshilo tulu, ne amasika nishio eshiokhulia shianje shionyene, buli shise abasuku banje bareebanga bari, “Nyasaye wenywe ali heena?”

⁴Olwa nditsulilanga akabira, omwoyo kwanje kubeelelanga muno, olwa ndatsitsanga nende emikanda, nebemilila okhutsia munzu ya Nyasaye, nibakhupa tsingalakala nibemba tsinyimbo tsiokhukhupa orio, olwa ndemililanga abandu okhukhola lisabo.

⁵Mbushiina omwoyo kwanje nikubeelela? Mbushiina nenyakhana mumwoyo kwanje endio? Ndalasuubila mu Nyasaye, okhuba ndalamwitsoomia khandi, ouli omuhabini wanje khandi Nyasaye wanje.

⁶Omwoyo kwanje kufwililiile mwisie, khulweshio ekhwitsulila iwe Nyasaye, nendi mulukongo lwa Yorodani, nende khushikulu shia Herimoni, nende khushikulu shia Mizari.

⁷Erumiilwe emiyembo chiamaatsi, emiyembo echio chitsanga hambi khwisie, nachio chilanganga emiyembo chindi. Amarunda kamaatsi kaayombooshilekhwo.

⁸OMWAMI Nyasaye akhoya yambelesia obuheelibwe oburalilu mushiteere, nasi emwimbile olwimbo lwokhumwitsoomia mushilo, emusaaye Nyasaye wobulamu bwanje.

⁹Ereebanga Nyasaye ouli olwanda lwanje endi, “Mbushiina niunzibilila? Mbushiina nenziililila okhunyakhana, khulwa okhusaandibwa nomusuku wanje?”

¹⁰Amanyeko kabasuku banje kanjoonyiye, olwa batsiililila okhunzeshelela nibaareeba bari, “Nyasayewo ali heena?”

¹¹Mbushiina nesinyikha mumwoyo endio? Mbushiina nenyakhana endio? Ndalara obunayi bwanje mu Nyasaye, okhuba ndalamwitsoomia khandi, ouli omuhabini wanje khandi Nyasaye wanje.