Read wanga TSITSABULI 44 Bible Online

TSITSABULI 44 - wanga bible

TSITSABULI 44

¹Iwe Nyasaye, khwahulila namarwi kefwe abeene, abakuuka befwe bakhuboolela, ebikhole ebikhongo bia wabakholela mutsinyanga tsiabwe, mutsinyanga tsiabira mbu,

²iwe omwene walonda abamahanga kandi khulwa obunyalibwo, khandi waralisia abandubo mushialo shiabwe, wahelesia abamahanga kandi abo eshinyasio, nebutswa abandubo wabaralisia.

³Abandubo shibahula abamahanga kandi abo khulwa tsikanga tsiabwe abeene ta, khandi shibabukula eshialo shiabwe khulwa amaani kabwe abeene tawe. Nebutswa kali khulwa obunyalibwo nende amaaniko, nende khulwa okhubahokhwo ninabo buli lwosi, okhwalolesia obuheelibwo khubo.

⁴Niwe omuruchi wanje khandi Nyasaye wanje, ounyalilanga abolwibulo lwa Yakobo okhuhula.

⁵Khuhulanga abasuku befwe khulwa obunyalibwo, khulwa eliiralio khusenachilanga hasi abaseeri befwe.

⁶Okhuba shindisikanga obuyingo bwanje, kata olukanga lwanje okhumbonia tawe.

⁷Nebutswa iwe wakhuhonia okhurula mubasuku befwe, khandi nohula abakhusila ifwe.

⁸Khulakhwitsoominjia buli lwosi, nikhukhuupila orio obushia nobushia.

⁹Nebutswa bulaano wakhwibalile nolekha nikhuhulwa, kata shioshitsitsanga mwihe nabamahe befwe tawe.

¹⁰Wakhukholile okhwilukha okhurula khubasuku befwe, nabo nibakhuyaaya ebindu biefwe.

¹¹Wakhukholile okhuba shinga amakondi akayilwa okhusinzwa, nokhusalaasia mumahanga kandi.

¹²Wakusiye abandubo obukusi bwa hasi, shinga abalalikhwo neinganga ta.

¹³Abamenyani befwe balolanga aka wakhukholela mana bakhunyokhosia nibakhutseshelela.

¹⁴Wakhukholile okhuba abandu bokhutseshelelwa mumahanga kandi, bakhuresilinjiakhwo emirwe chabwe nibakhunyeka ifwe.

¹⁵Efwimbungwa omurwe buli lwosi, endi netsisoni tsinyinji,

¹⁶khulwa amakhuwa nende amanyeko kabasuku banje nende abaasila isie.

¹⁷Amakhuwa ako koosi kakhwitsakhwo ifwe, kata kario shikhwakhwibilila, noho okhufunaka indakano ya wakaasia ninefwe tawe.

¹⁸Khushili okhubakhwo abakhayi khwiwe, noho kata okhulekha okhulonda amalakoko tawe.

¹⁹Nebutswa wakhulekha mutsisolo nabulimo, nokhulekha mushiilima eshimali ti.

²⁰Nikhwakhabele mbu khwakhulekha iwe Nyasaye wefwe, ne nikhwinamila omunyasaye undi,

²¹toto mwene iwe wakhamanyile likhuwa elo, shichila iwe wamanya akamasiliisi komumioyo chiefwe.

²²Nebutswa khulwa iwe, khwirungwa buli lwosi, nikhukholwa okhuba shinga amakondi akayilwa okhusinzwa.

²³OMWAMI Nyasaye! Buukha, mbushiina noli mundoolo? Buukha! Shiolakhwibala tawe inziayo.

²⁴Mbushiina niwibisa okhurula khwifwe? Mbushiina niwibilila amatinyu nende okhusandibwa khwefwe?

²⁵Khukwiile nikhutubulilwa hasi mulufu, khuhandile hasi khwiloba.

²⁶Buukha witse okhuhabine, okhuhonie khulwa obuheelibwo oburalilu.