Read wanga TSITSABULI 45 Bible Online

TSITSABULI 45 - wanga bible

TSITSABULI 45

¹Omwoyo kwanje kwitsuulemwo amakhuwa amalayi, ndimbila omuruchi olwimbo lwanje, olulimi lwanje luli shinga ikalamu yomuhandichi omusitsa.

²Iwe oli welikondo lilayi okhushila abandu bandi boosi, amakhuwako nakeshiloonyo, khulweshio Nyasaye yakhuhelesia ikhabi inziayo.

³Wibohe olukangalwo khushikhukunyushio, iwe owamaani amanji, iwe oli owoluyali khandi weing'oono.

⁴Muluyalilwo otsiililile okhuhula, okhuloonda obwatooto nende okhukhalaka habwene ebiina. Obunyalibwo bukhole amakhuwa amakhongo!

⁵Tsisele tsiobuyingobwo ni tsimemu, tsifumiranga emioyo chiabasukubo iwe omuruchi. Amahanga kakwitsanga hasi imbeliwo.

⁶Eshifumbi shioburuchi shia Nyasaye yakhuhelesia shilatsiililila okhubaho inziayo, indabushiyo yoburuchi niyobukhalachi bwahabwene.

⁷Iwe waheela obulunjishi ne nosila obumayanu, khulweshio Nyasaye, ouli Nyasayewo yakhwahula iwe khandi nakhusangasia muno okhushilakhwo abaruchi bandi.

⁸Ebifwalobio bili neshing'ari eshilayi, eshia manemane nende eshia omutalasini. Abakhupi bobukhana bakhutsatsahasinjia noli munzu tsioburuchi etsiasiaywa obulayi nende ameno keinzofu.

⁹Balala khubakhaana bakhukhalabanilanga mulwanyilwo nabakhaana babaruchi, naye omukhasi wotsiokhuteshia asinjiile khumukhonokwo musaatsa, yefwalile ebifwalo bieitsahabu inzeleleshe.

¹⁰Iwe omweha womuruchi, recheresia akemboola, yibilila abandu bewenywe nende abekhobo.

¹¹Likondolio lilayi lilakhola omuruchi okhukhwikomba, niye omwamiwo, kho okhuula omuhulilenje.

¹²Abandu belitookho lia Tiro bakhureerera ebihaanwa, nabo abayinda balenya mbu obakholele akabenya.

¹³Omweha womuruchi ali munzu yomuruchi! Inguboye yeshiselelo yakaasibwa khubuusi bweitsahabu.

¹⁴Areerwa imbeli womuruchi nafwalile inguboye yeshiselelo ing'inang'inu. Ebibakhwabie bimukooba, nibimureera imbeli womuruchi.

¹⁵Betsa mumwikhoyo nende mubutsatsahafu, nibenjila munzu yomuruchi.

¹⁶Iwe omuruchi wanje, olebula abasiani abanji, abalakalukha mushilenjeshio okhuba abaruchi. Nawe olabakhola okhuba abaruchi khushialo shiosi.

¹⁷Olwimbo lwanje lulakhola ifumayo okhubaho inziayo, ne abandu boosi balakhwitsoomia emiyika chiosi.