Read wanga TSITSABULI 48 Bible Online

TSITSABULI 48 - wanga bible

TSITSABULI 48

¹OMWAMI Nyasaye nowoluyali muno, khandi akhoyile okhwitsoomibwa muno mwitookho lia Nyasaye wefwe, elili khushikulushie eshitakatifu.

²Eshikulushie shia Zayuni neshirambi khandi eshilayi muno. Litookho liomuruchi woluyali lireera obusaangaafu khushialo shiosi.

³Nyasaye yemanyisiye omwene mbu nomulindi omulayi, wetsingoba tsielitookholie.

⁴Abaruchi bakhung'anile, betsile boosi halala okhuseera litookho lia Zayuni.

⁵Nebutswa olwa balilola besundukha, batiilwa noburi nibelukha.

⁶Indenga yabatiila, nibatsuunwa shinga omukhasi oulumwa inzibula.

⁷Basasibwa shinga lwomuyeka omukhongo kwebukwe kusasinjia tsimeeli tsia Tarishishi.

⁸Khwahuliile aka Nyasaye yakhola, khandi khwakaluutsi mwitookho lia OMWAMI Nyasaye omwene mahe, litookho lia Nyasaye wefwe, elia yaralisia inziayo.

⁹Nikhuli muhekaluyo iwe Nyasaye, khuyilisinjia khubuheelibwo oburalilu.

¹⁰Eliiralio litsoomibungwa buli habundu khushialo. Omukhonokwo musaatsa nokwobuhuli.

¹¹Lekha abandu ba Zayuni basaangaale, lekha amatookho ka Yuda kekhoye, okhuba obukhalachibwo nobwa habwene.

¹²Inywe abandu ba Nyasaye, chende mu Zayuni, nimulibotokhana nimubala eminaara chialio.

¹³Henje obulayi olukoba lwalio, mubire mutsinzu tsialio, kho mbu muboolele abolwibulo lwitsa inyuma muri,

¹⁴“Uno niye Nyasaye, Nyasaye wefwe ebisoni nebisoni. Alakhwimilila inziayo.”