Read wanga TSITSABULI 49 Bible Online

TSITSABULI 49 - wanga bible

TSITSABULI 49

¹Hulile kano inywe mwesi, recheresie inywe mwesi abamenyanga khushialo,

²mwesi abakhongo nende abatiiti, abayinda nende abamanani!

³Ndalaboola amakhuwa kobuchesi, amayililisio komumwoyo kwanje kalaba akobumanyilisi.

⁴Ndalarecheresia tsinjelo, ninzinoosia ebisina biatsio olwemba nekhupa obukhana bwelitungu.

⁵Mubise biamatinyu shindalaria eshindu, olwa emba nembotokhaanwe nabasuku,

⁶kata nembotokhaanwe nabandu abonooni, abesikanga obuyinda bwabwe nibeyitsiala khulwa obunji bwemiandu chiabwe tawe.

⁷Toto mwene shialiho omundu ounyala okhwinunula omwene, kata okhurunga Nyasaye omurungo okuhelana nobulamubwe omwene tawe.

⁸Okhuba omurungo kwobulamu bwomundu nokwobukusi obukhongo, shibulaho eshinyala okhuhela okhukurunga,

⁹kho mbu, omundu atsiililile okhumenya inziayo, nalatsia emakombe tawe.

¹⁰Nohenga nolola mbu, kata abachesi bosi bafwitsanga, kata abasilu nende abayingwa bosi bafwitsanga nibaleshela abandi emiandu chiabwe.

¹¹Ebilindwa nibio eshimenyo shiabwe inziayo, nibio ebia balimenyamwo ebisoni nebisoni, kata nibali nemikunda chia balanga mbu, nechiabwe abeene.

¹²Nebutswa omundu namundu shianyala okhuyindila muluyalilwe ta, ali butswa shinga tsisolo nabulimo etsifwitsanga.

¹³Obwo nibwo obumalilishi bwabandu abesikanga obusilu, nibwo obumalilishi bwabandu abachamisibungwa nobuyinda bwabwe.

¹⁴Barebwaho khulwa emakombe shinga amakondi, lifwa nilio elilaba omwayi wabwe. Balakholomokha shilunji nibatsia mushilindwa,[2] ne emibili chiabwe chilabola bwangu, Emakombe yilaba ingo wabwe.

¹⁵Nebutswa Nyasaye alaanunula isie okhurula mubunyali bwa Emakombe, shichila ye yakhambukule.

¹⁶Shimulatilwa noburi olwomundu ayindihala, noho olwemiandu chiomunzuye chitsiililila okhwimeeta tawe.

¹⁷Okhuba olwa alifwa, shialitsiakhwo neshindu shiosi ta, kata oluyalilwe shilulikholomokha ninaye mung'ani tawe.

¹⁸Kata omundu niyesaangaasia mubulamu bwomushialo muno, noho niyetsoomibwa shichila mbu, obulamubwe nobulayi,

¹⁹yakhafwe nalonda khubakuukabe, ewa baliba mushiilima inziayo.

²⁰Nebutswa omundu namundu shianyala okhuyindila muluyalilwe ta, ali butswa shinga tsisolo nabulimo etsifwitsanga.