Read wanga TSITSABULI 5 Bible Online

TSITSABULI 5 - wanga bible

TSITSABULI 5

¹Iwe OMWAMI Nyasaye, hulila okhusaaya khwanje. Recheresia ohulile okhushenya khwanje.

²Rechelesia okhuhaba khwanje, iwe omuruchi wanje khandi OMWAMI Nyasaye wanje, okhuba niwe owehaabilanga.

³Iwe OMWAMI Nyasaye, mumabwibwi ohulilanga amasaayo kanje. Eshialo nibushishia, ekhuhaanilanga amasaayo[1], mana enindilila amakalusioko.

⁴Okhuba iwe oli Nyasaye oulasangalilanga obumayanu ta, shiofuchililanga obumayanu okhwikholekha imbeliwo tawe.

⁵Abekhulumamia shibalasinjila imbeliwo ta, wasila abamayanu boosi.

⁶Omululanga ababoolanga akobubeeyi, wasila abekaati nende abaratsinjia eshitsayi.

⁷Nebutswa isie, khulwa obunji bwobuheelibwo oburalilu, ndalenjila muhekaluyo indakatifu. Ndalakhwinamilamwo khulwa okhukhuhelesia oluyali.

⁸Iwe OMWAMI Nyasaye, unzimilile mubulunjishibwo, shichila abasuku banje nabanji muno! Olunjisie injilayo enondekhwo.

⁹Abasuku banje shibaboolanga akobwatoto ta, emioyo chiabwe chikhabanga butswa obusasishi, amakhuwa kabwe nakobubeeyi bwokhwira, eminwa chiabwe chietsulamwo obubatsa.

¹⁰Iwe Nyasaye, lekha betuushe obwonooni bwabwe abeene, akabakaasinjia kabasasie abeene, Obalonde barule elwanyi, khulwa obwonooni bwabwe obunji, khandi khulwa okhuba bakhukholeele iwe induli.

¹¹Nebutswa lekha boosi abelushila obulindwibwo basaangaale, lekha buli lwosi bembe nibekhoya. Bambula obulindibwo khu abaheela eliiralio, kho mbu, basaangaalile mwiwe.

¹²Okhuba iwe OMWAMI Nyasaye, ohelesinjia abalunjishi ikhabi, obatereranga nobukoosiabwo shinga outerera neshikhumba.