Read wanga TSITSABULI 50 Bible Online

TSITSABULI 50 - wanga bible

TSITSABULI 50

¹Itsabuli ya Asafu OMWAMI Nyasaye owobunyali, alanganga abandu bokhushialo boosi, okhurula ebukwe okhuula mumbo.

²Nyasaye yashinjia obulafu okhurula Zayuni, litookho elili liobukondo obulayi muno.

³Nyasaye wefwe yetsanga, nebutswa shiyetsanga naholelile ta, omulilo kusambanga kuli imbeliwe, imbumbuyeka ikhongo imubotokhaane.

⁴Alanganga likulu nende eshialo mbu, bibe abaloli olwa akhalachila abandube eshiina.

⁵Aboola ari, “Mukhung'asilie abandu banje abali abesiikwa, abakhola indakano ninasi khulwa okhuukholela omusango.”

⁶Likulu lirumbulanga obulunjishibwe, okhuba Nyasaye mwene niye omukhalachi weshiina.

⁷“Recheresie emuboolele, inywe abandu banje, ndalamurumbulila obubi bwenywe inywe abandu ba Isiraeli. Isie nisie Nyasaye, ouli Nyasaye wenywe.

⁸Shiemuhalabilanga khulwa emisango chiamundeereranga, noho khulwa emisango emisambe chiamuhaanilanga tawe.

⁹Shindalafuchililakhwo ihunwa okhurula mwinywe, kata imbusi ikhole okhurula mubiayo bienywe tawe.

¹⁰Shichila tsisolo nabulimo tsiosi, kata tsing'ombe ebikhumila etsili mubikulu, biosi nebianje.

¹¹Amanyonyi koosi nakanje, khandi biosi ebichendanga khushialo nebianje.

¹²“Kata inzala niyiba niyinuma, shienyala okhumusaba eshiokhulia ta, shichila eshialo nende buli shindu shilimwo, biosi nebianje.

¹³Mupaara mbu, isie enyala okhulia inyama yetsisurusi, kata okhunywa amatsayi ketsimbusi noho?

¹⁴Muukholele isie Nyasaye wenywe omusango kwokhukhupa orio, mana muusie ebiitsubo biamwanzitsubila isie ouli Omukhongo Muno.

¹⁵Muhaabile olwa muba nimuli mumatinyu, nasi ndalamuhonokosia nenyu mulanzitsoomia.”

¹⁶Nebutswa khubamayanu, Nyasaye aboola ari, “Mbushiina nimurumbula rumbula butswa amalako kanje? Mbushiina nimuboola boola butswa khukeindakano yanje?

¹⁷Shichila mwasila amechesio kanje, khandi shimuhulilanga amalako kanje tawe.

¹⁸Mwikholanga abetsa ba buli omwifi wamulola, khandi muchendanga nende abaheyi.

¹⁹Buli lwosi mwanguyilisinjia okhuboola akobwonooni, ne shimuriitsanga okhubeya tawe.

²⁰Mwanguyilisinjia okhwinjilila abaana benywe namakhuwa amabi, nimubakhabilisiakhwo obumayanu.

²¹Mwakhola amakhuwa ako koosi, nasi neholeela butswa, kho nimupaara mbu, endi shinga inywe butswa. Nebutswa bulaano emuhalabila, nemurumbulila habulafu obumayanu bwenywe.

²²Inywe abandechelesinjia, hulile kano, nebutswa nimuba nimulambulila ta, shialabaho omundu kata mulala oulamuhonokosia inywe tawe.

²³Oukholela omusango kwokhukhupa orio, niye oumbelesinjia oluyali, naye oukholanga akenzenya, niye owa ndalahonia.”