Read wanga TSITSABULI 51 Bible Online

TSITSABULI 51 - wanga bible

TSITSABULI 51

¹Iwe Nyasaye, khulwa obuheelibwo oburalilu, umbeele tsimbabasi. Khulwa obunji bwetsimbabasitsio, osiiliisie obwonooni bwanje.

²Unzosie obumayanu bwanje bwosi, usiiye obwonooni bwanje.

³Okhuba emanyile obumayanu bwanje, khandi buli lwosi obwonooni bwanje buli imbeli wanje.

⁴Niwe wenyene owandayonooneele, ndakholile akobumayanu imbeliwo. Kho oli habwene olwa ukhalachila eshiina, khandi obula eshikha mubukhalachibwo.

⁵Lola, isie ndali butswa omwonooni okhurula khunyanga yandebulilakhwo, khandi ndabelekhwa munda ya mama mubwonooni.

⁶Iwe wenyanga obwatooto bwomumwoyo mukari, khulweshio unzechesie obuchesi bwomumwoyo kwanje mukari.

⁷Usiiye obwonooni bwanje, nasi ndalaba omusiiyikhu, unzosie nasi ndalaba omulafu okhushila itsaluchi.

⁸Umbelesie obusaangaafu nende obutsatsahafu mumwoyo kwanje, kata noba niundubuule nende okhufunaka amakumba kanje.

⁹Shiolahenga obwonooni bwanje ta, osiiye obumayanu bwanje bwosi.

¹⁰Iwe Nyasaye, olonje mwisie omwoyo omweleleshe, khandi ureemwo omwoyo omuyia khandi omuhulili.

¹¹Shiolaafuuba mbu, erule imbeliwo, kata okhurusiamwo Rohowo omutakatifu tawe.

¹²Umbelesie khandi obutsatsahafu burulanga khubuhoniabwo, khandi umbelesie omwoyo kwokhuba omuhulili khwiwe.

¹³Nasi ndalechesia abonooni amalakoko, nabo balakhukalushila iwe.

¹⁴Iwe Nyasaye omuhonia wanje, umbonie okhurula mubwoonooni bwokhwira, nasi ndalasaangaala okhurumbula akobulunjishibwo.

¹⁵Iwe OMWAMI Nyasaye, wikule omunwa kwanje, nasi ndalakhwitsoomia.

¹⁶Iwe shiwenyanga emisango ta, nebutswa ndakhakhukholeele. Iwe shiochamisibungwa nende emisango emisambe tawe.

¹⁷Omusango kwanje khwiwe Nyasaye, nomwoyo omwituutuyi, iwe Nyasaye, shiolaloba omwoyo kwomundu omwituutuyi, ousaba obuleshelwi tawe.

¹⁸Okholele Zayuni amakhuwa amalayi mubukoosiabwo, ne umbashe tsingoba tsia Yerusalemu obuyia.

¹⁹Nolwa olachamisibwa nemisango chia habwene, nende emisango chefwe emisambe. Emisango chietsisurusi tsilamalilwa khushimalilo shiemisangoshio.