Read wanga TSITSABULI 55 Bible Online

TSITSABULI 55 - wanga bible

TSITSABULI 55

¹Iwe Nyasaye, hulila okhuhaba khwanje, ne shiolashiukhana okhurula khukhuhaba khwanje tawe!

²Olwekhuhabila urecheresie mana umbulile, emalile okhuhulwa namatinyu kanje.

³Emalile okhuchoonya noluyoka lwabasuku banje, enzunwa khulwa okhusandibwa nabonooni. Okhuba bandeereranga amatinyu, khandi basilanga khulwoburuma bwabwe.

⁴Omwoyo kwanje kuli nende eshibeela, obuhendi bwokhufwa bundubuule.

⁵Oburi nende obuhendi bindiilile, khandi amariisia kahulile.

⁶Ndikombanga nemboola mbu, nindakhabeele netsimbaha shinga lihusi,

⁷ndakhapuluushe nenzia ehale, ndakhatsiile okhumenya mushitsiimi.

⁸Ndakhanguyilisiye okhunyoola bwangu ahokhwishinga okhurula mumuyeka omukhongo nende mumbumbuyeka.

⁹Iwe OMWAMI Nyasaye, sasia amarechekho kabasuku banje, mana okoyaasie amakhuwa kababoolanga, okhuba endolanga obusoolo nende induli nibili mwitookho.

¹⁰Bibotokhanangamwo eshilo neshiteere, ne obumayanu nende amasila bili mulio.

¹¹Obusasishi buli buli habundu, obusandibwi nende obukaati shibihwetsangaho mutsinjila tsialio tawe.

¹²Naba mbu nomusuku ounzeshelelanga, ndakhefwiliile, naba mbu nomundu wakhuyingananga ninaye ounziyitsialilangakhwo, ndakhebisile okhurula khuye.

¹³Nebutswa niwe owakhuchendanga ninaye, ouli owashianje khandi omwitsa wanje wahambi.

¹⁴Khwakhupanga tsimbakha tsindayi ninawe, nikhwinamila Nyasaye halala muhekalu.

¹⁵Abasuku banje bakhoya bafwa ebise biabwe nibishili okhuula, bakhoya batsia emakombe nibashiliho mwoyo, bakhoya barulaho mubuhendi nibatsia mubilindwa biabwe.[3]

¹⁶Nebutswa isie ehaabilanga Nyasaye khulwobukhoonyi, ne OMWAMI Nyasaye alambonia.

¹⁷Mumabwibwi, eshiteere nende khungoloobe emuhaabilanga nindiyiniakana nende okhubinda, naye ahulilanga okhuhaaba khwanje.

¹⁸Alanjelesia neshiliho mwoyo habwene okhurula mumahe kelwananga nabasuku banje boosi.

¹⁹Nyasaye oubetsangaho muburuchi okhurula khale, alambulilisia naye alabahula, okhuba shibekalukhasinjia ta, khandi shibamuhelesinjia oluyali tawe.

²⁰Owashianje yaseerire abetsabe, yafunaache obusuubisiebwe.

²¹Amakhuwake kali amanyushe okhushila amafura amasaalule, nebutswa omwoyokwe kwetsulamwo isila. Amakhuwake kali amarerere okhushila amafura. Nebutswa kakhalakanga okhushila olukanga olumemu.

²²Leshela OMWAMI Nyasaye amatinyuko, naye alakhukhoonya, shichila shiafuchililanga abandu abalunjishi okhuhulwa tawe.

²³Nebutswa iwe Nyasaye, olakhola abeeri nende ababeeyi abo beerwe nibashili okhumenyakhwo kata inusu yobulamu bwabwe tawe. Habula isie nasi ndalesika iwe.