Read wanga TSITSABULI 58 Bible Online

TSITSABULI 58 - wanga bible

TSITSABULI 58

¹Inywe abaruchi, mupaara mbu, tooto mukholanga obukhalachi bwa habwene? Mukhalachilanga abandu boosi ebiina habwene?

²Tawe! Mupaaranga butswa amabi kamunyala okhukhola, khandi mukholanga butswa akobumayanu bweinduli mushialo.

³Abandu abonooni bakholanga butswa obumayanu mubulamu bwabwe bwoosi, okhurula nibeebulwa baboolanga butswa akobubeeyi.

⁴Betsulamwo obufwisi shinga obweinzokha, bali shinga inzokha yeliini eyilahulilanga ta,

⁵inzokha yeliini eyilahulilanga kata omwoyo kwabachiruka, noho kata okhuhulila amayoosi komufumu omusitsa wobulosi tawe.

⁶Iwe Nyasaye, funaka ameeno komuminwa chiabwe, iwe OMWAMI Nyasaye, okhuule ameeno ketsitalanyi tsimbukha etsio.

⁷Bakhoya bakhamulukha shinga amaatsi keikhula, baseenachilwe hasi nibaniala shinga obunyasi khunjila.

⁸Babe shinga amakhomonio akasaalulukhanga nikareerwekhwo omunyu, babe shinga omwana omuhuusa, oulaalolakhwo eliuba tawe.

⁹Betsukhane butswa nibaremaakwe shinga obunyasi, Nyasaye alabamulula bwangu shinga omuyeka mwirumalie lilulu, nibashiliho mwoyo.

¹⁰Abalunjishi balasaangaala olwa balola abonooni nibaheebwa eshinyasio, Balaseena ebilenje biabwe mumatsayi kabandu abonooni.

¹¹Abandu balaboola bari, “Tooto mwene omurungo kuliho khubalunjishi! Tooto mwene Nyasaye aliho oukhalachilanga abandu eshiina khushialo.”