Read wanga TSITSABULI 59 Bible Online

TSITSABULI 59 - wanga bible

TSITSABULI 59

¹Iwe Nyasaye wanje, umbonie okhurula khubasuku banje, uniinde okhurula khubandu baseeranga abo!

²Umbonie okhurula khubandu bakholanga obumayanu abo, uhonokosie okhurula khubandu abeeri abo!

³Lola! Bangonesheele okhunzira, abandu abaraasi bakhung'anile okhuuyinga isie. Iwe OMWAMI Nyasaye, shikali mbu ekholile obwonooni, noho kata obumayanu tawe.

⁴Kata shiekholilekhwo libi liosi liosi elichila nibanguyilisia okhuseera tawe.

⁵Buukha, OMWAMI Nyasaye omwene mahe, witse umbabine. Nyasaye wa Isiraeli, omwene lola! Buukha ohelesie abandu abamayanu bano eshinyasio, shiolabeelakhwo abakhayi batutanga okhukhola akobumayanu abo tawe.

⁶Bachelelanga khubwile, nibasema shinga tsimbwa, nibachendachenda mwitookho.

⁷Hulilakhwo butswa amanyeko nende amakhuwa kabwe kokhuriisia. Tsinimi tsiabwe nitsimemu shinga tsinganga muminwa chiabwe, khandi bapaaranga mbu, abulaho ouhulilanga amakhuwa kabwe tawe.

⁸Nebutswa OMWAMI Nyasaye, iwe obatseshelelanga, otseshelelanga abamahanga koosi.

⁹Iwe Nyasaye, niwe amaani kanje, ndalakhwimbila nekhwitsoomia, shichila niwe obwilushilo bwanje.

¹⁰Nyasaye wanje alanzakanila mubuheelibwe oburalilu, alanyalila okhulola abasuku banje nibahulilwe.

¹¹Iwe Nyasaye, shiolabeera ta, abandu banje bakhetsukhana bebilila, khulwa obunyalibwo obasaalasie nobahula, iwe OMWAMI Nyasaye, ouli ingabo yefwe.

¹²Bo bakholanga obwonooni mukababoola koosi, khandi amakhuwa kabwe namabi, bakhoya batiilwa nibashili mubwichinjimisi bwabwe! Shichila barumbulanga eshilaamo shiobubi nibabeeya,

¹³muburumabwo, obasasie, obasasilie elala. Ne abandu balamanya mbu, iwe Nyasaye, niwe omuruchi wabandu ba Isiraeli, ne oburuchibwo buulanga khushialo shiosi.

¹⁴Abasuku banje bachelelanga buli nibwakheela, nibasema shinga tsimbwa, nibachendachenda mwitookho.

¹⁵Bachendanga nibakhaabilisia eshiokhulia, ne nibalanyoolile eshibahela ta, nibabuuluula.

¹⁶Nebutswa, isie ndalemba ninditsoomia amaaniko, buli mumabwibwi ndalembanga ninditsoomia obuheelibwo oburalilu. Shichila mutsinyanga tsiamanyakhano kanje, niwe oubetsanga olukoba lwanje, khandi obwilushilo bwanje.

¹⁷Ndalemba nekhwitsoomia iwe, ouli amaani kanje, shichila iwe Nyasaye, niwe olukoba lwanje, khandi umanyinjia obuheelibwo oburalilu.