Read wanga TSITSABULI 6 Bible Online

TSITSABULI 6 - wanga bible

TSITSABULI 6

¹Khumurereesi wetsinyimbo: eyokhwimbwa okhulondokhana nende Sheminitsi. Itsabuli ya Daudi. Iwe OMWAMI Nyasaye, shiolahalabila isie mubusinyishibwo ta! Kata shiolambelesia eshinyasio mwirumalio tawe.

²Iwe OMWAMI Nyasaye, umbeele tsimbabasi, shichila amaani kanje kahwele. Umbonie, okhuba amakumba kanje kamalile okhuchoonya.

³Omwoyo kwanje nakwo kunyakhana muno. OMWAMI Nyasaye, ndalalindilila obuhabinwibwo okhuula liina?

⁴OMWAMI Nyasaye, yitsa umbonie, umbonie khulwa obuheelibwo oburalilu.

⁵Okhuba oumalile okhufwa shianyala okhukhwitsulila ta, niwiina owakhakhwitsoomia nali Emakombe?

⁶Enjoonyile nokhubinda khwanje, buli eshilo endosinjia obukono bwanje namasika, eyembinjia amasika khushitali shianje.

⁷Tsimoni tsianje tsichoonyile khulwa eshibeela, tsifimbile khulwa okhuchoonyibwa nabasuku banje.

⁸Muurulekhwo inywe mwesi abakholi bobumayanu, okhuba OMWAMI Nyasaye ahuliile okhwikhuula khwanje.

⁹OMWAMI Nyasaye ahuliile okhusaba khwanje, khandi afuchiliile amasaayo kanje.

¹⁰Abasuku banje boosi balafwimbwa omurwe nibatiilwa noburi, balashiukhana, nibafwimbibwa omurwe matetekhana.