Read wanga TSITSABULI 60 Bible Online

TSITSABULI 60 - wanga bible

TSITSABULI 60

¹Iwe Nyasaye, okhwibalile, khandi okhuhulile. Okhusinyishiile, nebutswa bulano okhushiukhanile nokhukalusilia amaani.

²Okholile eshialo okhurenga, khandi oshiarasiyemwo hakari. Osube tsinzafwa tsiashio, okhuba shisiabukhangamwo.

³Wakholile abandubo okhunyakhana muno, khuchendanga nikhukoyana shinga abameelile amalwa.

⁴Wamalile okhuchetsiyia abakhuriitsanga iwe, kho mbu, bahonokoshe mubusasishi.

⁵Okhuhonie okhubirira mumaaniko, ohulile amasaayo kefwe, kho mbu, abandubo abahelwa bahonokoshe!

⁶Nyasaye nali hatakatifuwe yaboolile ari, “Ndalekhoya ningabulamwo Shekemu, khandi ndalakabulamwo libanda lia Sakotsi nengabila abandu banje.

⁷Eshialo shia Giliadi neshianje, khandi eshia Manase shiosi neshianje. Eshialo shia Efuraimu nishio ikutwa yanje, nashio eshialo shia Yuda nishio indabushi yanje yoburuchi.

⁸Eshialo shia Moabu nishio olukaraya lwanje lwokhusaabilakhwo. Ndalasukuna eshilaaro shianje khushialo shia Edomu, okhumanyia mbu, neshianje. Ne khulwobuhuli ndalakhupila khushialo shia Filisiti tsingalakala.”

⁹Iwe Nyasaye, niwiina oulanzusia mwitookho liabotokhanwa nolukoba? Niwiina oulanzimilila okhuula Edomu?

¹⁰Tooto mwene iwe wakhulobile? Shiotsia ninefwe ebulafu mumahe kefwe tawe noho?

¹¹Okhukhoonye okhulwana omusuku wefwe, shichila obuhabini bwomundu nobwa butswa.

¹²Nyasaye nali ninefwe khulahula, niye oulahula abasuku befwe.