Read wanga TSITSABULI 62 Bible Online

TSITSABULI 62 - wanga bible

TSITSABULI 62

¹Ndisumilisinjia nenindilila Nyasaye yenyene okhumbonia, shichila obuhonia bwanje burulanga khuye.

²Ye yenyene niye obwilushilo bwanje khandi obuhonia bwanje. Niye olukoba lwanje ne shindalahulwa tawe.

³Inywe mulaaseera okhuula liina? Inywe mulaakhupa okhuula liina, isie omundu owinaame butswa shinga lisiisi lili hambi okhukwa?

⁴Mukhaabanga butswa okhungwisia okhurula khushifumbi shianje shioluyali, inywe musaangaalilanga butswa okhuboola akobubeeyi. Musabilanga abandu tsikhabi, nebutswa mumioyo chienywe mukari mulaamanga eshilaamo shiobubi.

⁵Ndisumilisinjia ne niindilila Nyasaye yenyene, shichila obunaayi bwanje buli muye.

⁶Ye yenyene niye obwilushilo bwanje khandi obuhonia bwanje. Niye olukoba lwanje ne shindalahulwa tawe.

⁷Nyasaye niye obuhonia bwanje khandi oluyali lwanje, niye omuliindi wanje omukhongo khandi obwilushilo bwanje.

⁸Inywe abandu banje, mumwisichenje buli lwosi, mumuboolele obutinyu bwenywe bwosi, shichila niye obwilushilo bwefwe.

⁹Abandu boosi bali butswa shinga omuya, abayinda kata abamanani boosi ni butswa, nobara khuratili, shibali nobusiro ta, nabangu okhushila omuya!

¹⁰Shimulara obusuubili bwenywe mumakhwa keinduli ta, shimulara obunaayi bwenywe mukhunuula abandu ebindu ta, kata obuyinda bwenywe nibumeetekha shimulasuubilile mubwo tawe.

¹¹Akhandi akhanji ndahulila Nyasaye naboola mbu, obunyali nobubwe,

¹²khandi mbu, obuheelibwe noburalilu. Iwe OMWAMI Nyasaye, omwene orunje buli mundu okhulondana nende ebikholebie.