Read wanga TSITSABULI 65 Bible Online

TSITSABULI 65 - wanga bible

TSITSABULI 65

¹Iwe Nyasaye, nobulayi ifwe okhukhwitsoomia mwitookho lia Yerusalemu[4] nende okhuliinda akakhwakhusuubisia,

²shichila ohulilanga amasaayo kefwe. Abandu boosi baletsa khwiwe okhukhukholela omusango

³khulwa obwonooni bwabwe. Olwa obwonooni bwefwe bubetsanga nibuli obunji, iwe omwene okhubeelanga tsimbabasi.

⁴Nabeikhabi abawahulanga nobasitia ahambi okhwinjila habunduwo hatakatifu. Khulekura ebindu ebilayi ebiakhunyoolanga munzuyo, nende tsikhabi tsiakhunyoolanga muhekaluyo indakatifu.

⁵Okhuhulilanga nokhukhoonya khulwa okhukhuhelesia obuhuli. Khandi okhuhoninjia khulwa okhukhukholela ebikhole biamakana. Abandu bomushialo shiosi nende abali injelekha weinyanza besikanga iwe.

⁶Wasimikha ebikulu khulwa amaaniko, shichila oli nobunyali obukhongo.

⁷Oholelesinjia okhuhoola khwetsinyanza, nende okhuhoola khwamarunda katsio, khandi oholelesinjia induli yabandu.

⁸Abandu bamenyanga mumbali tsiehale khushialo boosi bariitsanga ebikholebio biamakana. Abandu boosi okhurula ebukwe okhuula mumbo bakhupanga tsingalakala khulwa okhwikhoya.

⁹Ololesinjia obulindibwo khushialo khulwa okhushikwisilia ifula, noshikhola okhuba eshilayi khandi eshinulu. Witsusinjia emichela nochila eshialo nishiba nende emimela. Okholanga orio munjila yino:

¹⁰Okwisinjia ifula inyinji khumikunda niyichila amayindi nikatubukha.

¹¹Obulayibwo bukhuhelesinjia ifwe lichesa lilayi, buli aha iwe waburirakhwo emiandu chietsulaho.

¹²Obwayilo bwosi bwitsuulemwo ebiayo, natsio tsingulu tsiosi tsitsuule obusaangaafu.

¹³Olwayilo lwitsuulemwo ebiayo, nako amabanda ketsuulemwo imele, biosi bikhupanga tsingalakala nibiikhoya.