Read wanga TSITSABULI 66 Bible Online

TSITSABULI 66 - wanga bible

TSITSABULI 66

¹Abandu bokhushialo mwesi mwikhoye nimwitsoomia Nyasaye!

²Yimbe nimurumbula oluyali lweliralie, nimuboola mbu Nyasaye nomukhongo!

³Boolele Nyasaye muri, “Ebikholebio nebiokhuhuchisia, nabwo obunyalibwo nobukhongo muno, kho mbu, abasukubo basikamanga hasi imbeliwo khulwa okhukhwinamila!

⁴Abandu boosi khushialo bakhwinamilanga, bembanga nibakhwitsoomia, bakhwimbilanga nibetsoomia eliiralio.”

⁵Yitse mulole ebikhole biamakana bia Nyasaye yaakholile mubandu.

⁶Yakalukhasia inyanza inzakhanyu niyikwa liloba eliumu, abakuuka befwe bachenda khubilenje nibaambukha omuchela okwo. Habwene yaho khwekhoya khukayali nakholile.

⁷Arukanga emiyika chiosi khulwa amaanike ne tsimonitsie tsihenganga khubamahanga, kho abakholi beinduli shibaleyitsiala tawe.

⁸Inywe abandu boosi mwitsoomie Nyasaye wefwe, oluyoka lwokhwitsoomia khwenywe khuye luhulilishe.

⁹Niye ouchilanga nikhubaho mwoyo, ne shiafuchililanga mbu khuhulwe tawe.

¹⁰Iwe Nyasaye wakhuteema, wakhuteema shinga olwa ifetsa yisambungwa mumulilo khulwa okhuchisiiya.

¹¹Wakhulekha nikhunyakhana, nokhureerera amatinyu amakhongo.

¹²Walekha abasuku befwe nibaseena emirwe chiefwe, khwabirira mumatinyu nende mumasila, nebutswa bulano wakhureerire habundu wobuyinda obunji.

¹³Ndalakhureerera emisango emisambe munzuyo, ndalakhuhaanila eshia ndetsuba okhukhuhelesia.

¹⁴Olwa ndali mumatinyu ndakhwitsubila, bulano ndalakhuhelesia eshia ndetsuba okhukhuhelesia.

¹⁵Ndalakhuhelesia emiruko eminulu chibe omusangokwo omusambe. Ndalakhumalila omusango kwesisurusi nende tsimbusi, ne isakakha yomusango kwamakondi yilakhwitsila.

¹⁶Yitse muhulilisie inywe mwesi abenamilanga Nyasaye, ndalamuboolela akayakholeele,

¹⁷Ndamuhabila nomwoyo omukhongo, nemwitsoomia nolulimi lwanje.

¹⁸Nemba mbu ndali namapaaro kobwonooni mumwoyo kwanje, OMWAMI Nyasaye shiyakhambulilisiye tawe.

¹⁹Nebutswa toto Nyasaye wayambulilisiye, yahuliile okhusaaya khwanje.

²⁰Nditsoominjia Nyasaye, shichila shiyalobile amasaayo kanje noho kata okhulekha okhuumanyia obuheelibwe oburalilu tawe.