Read wanga TSITSABULI 68 Bible Online

TSITSABULI 68 - wanga bible

TSITSABULI 68

¹Leshe Nyasaye abuushe, asalaasie abasukube. Lekha abamusila belushe khulwa okhuhulwa.

²Shinga olwomwosi kutuumuulwa nomuyeka, nolwa atsia okhubatuumuula ario. Shinga olwa ihula yisalulukha niyili hambi nomulilo, nolwa abamayanu bakhoya okhubasikha bario imbeli wa Nyasaye.

³Abalunjishi bakhoya bekhoya nibasaangaala imbeli wa Nyasaye, batsatsahalanga nibekhoyanga mubusaangaafu.

⁴Mumwimbile Nyasaye, mumwimbile nimwitsoomia eliiralie, mumukaasilie omuhanda oyo ouchendanga mushitsiimi. Eliiralie niye OMWAMI Nyasaye, mutsaatsahale imbeliwe!

⁵Nyasaye oumenyanga muhekaluye indakatifu anunulanga ababisandu khandi alindanga abalekhwa.

⁶Abahelesinjia ababula habundu hokhumenya amataala kokhumenyamwo, Abohololoholanga ababohe nabara mubulayi. Nebutswa abakholi beinduli balamenya mushialo eshiangalamwe.

⁷Iwe Nyasaye, olwa wemilila abandubo, olwa wachenda nobura mushitsiimi,

⁸eshialo shiarenga, nalio likulu nilikwisia ifula yinyinji, khulwa iwe Nyasaye oumenyanga mushikulu shia Sinai, khandi Nyasaye khulwokhubahokhwo iwe wa Isiraeli.

⁹Iwe Nyasaye, wakwisia ifula inyinji, nokhola eshialoshio eshiali nishiasasikha okhuba eshilayi.

¹⁰Abandubo bakaasiamwo eshimenyo shiabwe, ne mubulayibwo wahelesia abatakha eshia batamba.

¹¹OMWAMI Nyasaye yahaana lilako, ne abakhasi abanji nibatswania amakhuwa bari,

¹²“Abaruchi nende abelihe babwe belukhanga.” Ne abakhasi bali nango nibasikaale mushitioli shiamakondi bakabana ebiali nibiyaayilwe nibio:

¹³Ebifwanani biamahusi akabakhwakhwo ifetsa khandi aketsimbaha tsiako tsiali nobung'inang'inu bweitsahabu.

¹⁴Olwa Nyasaye Wobunyali yasalaasia abaruchi khushikulu shia Zalumoni, yakhola itsaluchi okhukwayo.

¹⁵Iwe eshikulu shia Nyasaye, nishio eshia Bashani, eshikulu shili nobutenje obunji! Eshikulu shia Bashani.

¹⁶Iwe eshikulu shili nobutenje obunji, mbushiina nohenganga nomookoola eshikulu shia OMWAMI Nyasaye yeyahulila okhumenyakhwo? OMWAMI Nyasaye alamenyakhwo emiyika nemiyika.

¹⁷OMWAMI Nyasaye arulanga khushikulu shia Sinai, niyenjila habundu hatakatifu nali namakaari kelihe ebikhumila nebikhumila.

¹⁸Abukulanga abahambe natikulukha ninabo okhuula khubutenje bweshikulu, ne abakholi beinduli abo bamuhelesia ebihaanwa, kho mbu, OMWAMI Nyasaye anyale okhumenyayo.

¹⁹Khwitsoomia OMWAMI Nyasaye, ouchinganga emisiko chiefwe buli nyanga. Nyasaye niye oukhuhoninjia.

²⁰Nyasaye wefwe, ni Nyasaye ouhoninjia, niye OMWAMI Nyasaye wefwe, oukhuhonokosinjia okhurula mukhufwa.

²¹Nebutswa Nyasaye alasaasaka emirwe chiabasukube, alasaasaka emirwe chiabandu bakhayila mubumayanu.

²²OMWAMI Nyasaye yaboola ari, “Ndalakalusia abasuku benywe okhurula Bashani, ndalabakalusia okhurula mulusiba lweinyanza,

²³kho mbu, musene mumatsayi kabwe, natsio tsimbwa tsienywe nitsikakhomba nitsiikura.”

²⁴Iwe Nyasaye, abandu boosi balutsi emikhululochio chiobuhuli, balutsi emikhululo chia Nyasaye wanje, ouli omuruchi wanje niyenjila habunduwe hatakatifu.

²⁵Abembi bemiile imbeli, nabo abakhupi bobukhana nibalondakhwo inyuma, ne hakari wabwe abakhaana bakhupa manyanga.

²⁶“Mwitsoomie Nyasaye mumikhung'ano chienywe emikhongo, mwitsoomie OMWAMI Nyasaye inywe abolwibulo lwa Yakobo.”

²⁷Owimiile imbeli ni Benjamini, ouli omutuutu khu boosi, abalondilekhwo nabeemilisi ba Yuda nende omukanda kwabwe, abamaliliishe nabemilisi ba Zebuluni nende aba Nafutali.

²⁸Iwe Nyasaye, manyia abandu obunyalibwo obukhongo, bamanyie obunyali bwawekhoonyela okhulwanila ifwe.

²⁹Abaruchi balakhureerera ebihaanwa khulwa Ihekaluyo eyili Yerusalemu.

³⁰Ohalabile abandu beshialo shia Misiri, abali shinga isolo yili mwiswa, ohalabile abamahanga abali shinga lihetso lietsisurusi nende ebimoosi biayo, okhuula olwa boosi bakhwinamila nibakhureerera ifetsa. Osalaasie abandu baheela lihe abo.

³¹Abarume baletsa okhurula Misiri, nibakhureerera omukasa, nabo aba Etsiopia balanguha okhuchinguula amakhono kabwe nibenamila OMWAMI Nyasaye.

³²Inywe abamahanga kokhushialo, imbile Nyasaye, mwimbe nimwitsoomia OMWAMI Nyasaye,

³³Khu omwenoyo ouchendanga mwikulu, ouchendanga mwikulu eliabetsangaho okhurula khale na khale. Mumurecheresie shinga olwakukuma nomwoyo omukhongo kwobunyali.

³⁴Rumbule obunyali bwa Nyasaye, ouli omuruchi wa Isiraeli, ne obunyalibwe buulanga mumaleesi.

³⁵Nyasaye nali habunduwe hatakatifu, nowamariisia, Nyasaye wabandu ba Isiraeli, ahelesinjia abandube obunyali nende amaani. Nyasaye yetsoomibwe.