Read wanga TSITSABULI 69 Bible Online

TSITSABULI 69 - wanga bible

TSITSABULI 69

¹Iwe Nyasaye, umbonie! Okhuba amaatsi kanzulile mwikosi.

²Ndiyinikhanga mulutende olwiyinikhu muno, khandi shiendikhwo nende ahokhusena ebilenje tawe. Ndiyiniishe mulusiba lwamaatsi lwene, ne amarunda kambirangakhwo.

³Enjoonyile nokhuhaba khwanje, khandi ehalaashe hamwoyo. Tsimoni tsianje tsichoonyile neniindililanga obukhonyibwo iwe Nyasaye wanje.

⁴Abasuku abaasila butswa obulalikhwo neshichila, nabanji okhushila liswi liokhumurwe kwanje. Abasuku banje baboolanga akobubeeyi khwisie, nabamanani muno ne benyanga okhunzira. Bakhola okhukalusia ebindu bia ndaleeba tawe.

⁵Iwe Nyasaye, wamanya obusilu bwanje, kata obwonooni bwa ndakhola shindabubisa khwiwe tawe.

⁶Shiolafuchilila abandu besikanga iwe banyoola eshifwimbwa murwe khulwanje tawe. Iwe OMWAMI Nyasaye wamahe, shiolafuchilila abandu abakhwinamilanga okhutiilwa netsisoni khulwanje ta, iwe Nyasaye wa Isiraeli!

⁷Enyekungwa khulwa iwe, khandi endi neshifwimbwa murwe eshikhongo muno.

⁸Engwile shinga omucheni khubaana befwe, khandi shinga omurende khubomunzu yefwe.

⁹Obuheeli bweihekaluyo bunditsanga shinga omulilo kusambanga, ne amanyeko kabandu bakhunyekanga kangwiliile isie.

¹⁰Olwa ndetiitiyia mumwoyo kwanje nokhuhonga inzala khulwokhusaaya, abandu baanyeka.

¹¹Olwa ndefwala tsingubo tsiamakunia khulwa okhwikhuula, ndekhola inzekho khubo.

¹²Abandu bamonyanga khumihanda, abameesi bakaasinjia tsinyimbo khwisie.

¹³Nebutswa isie ekhusaayanga iwe OMWAMI Nyasaye, iwe Nyasaye, ohulile okhusaaya khwanje mubise biokhwenyakhwo. Umbulile okhusaaya khwanje khulwobuheelibwo oburalilu, okhuba iwe ohesinjia obusuubisiebwo bwokhuhonia.

¹⁴Uhonokosie endeshe okhwiyinikha mulutende, umbonie okhurula khubasuku banje, khandi okhurula mulusiba lwamaatsi.

¹⁵Shiolafuchilila ndayilwa nomuyembo kwamaatsi, kata mbu ndiyinishe mulusiba, noho kata mbu amaatsi okhuumila tawe.

¹⁶Iwe OMWAMI Nyasaye, mubuheelibwo oburalilu umbulile, mubunji bweshisashio ushiukhanile niukhoonya!

¹⁷Shiolafisa obwenibwo okhurula khumukhalabaniwo ta, umbulile bulano, shichila endi mumatinyu amakhongo.

¹⁸Yitsa ahambi ninasi, umbonie, uhonokosie okhurula khubasuku banje.

¹⁹Iwe omanyile shinga olwa enyekungwa, omanyile shinga olwa efwimbibungwa omurwe khandi shinga olwa efwolungwa. Omanyile abasuku banje boosi.

²⁰Amanyeko katubuulile omwoyo kwanje, ne emalile okhufwa omwoyo pe. Ekhaabile abokhundolela eshisa, nebutswa shibabeeleho ta, nekhaaba abokhunemia omwoyo, nebutswa shiebanyoolile tawe.

²¹Olwa ndali inzala bambelesia obufila mushilenje shiokhumbelesia eshiokhulia. Ne olwa ndali nobuloho, bambelesia idivai eyiraanyile mbu, enywe.

²²Amasabo kabwe abeene kakhoya kabareerera obusasishi, nako amasabo kabwe amatakatifu kakhoya kachila baakwa.

²³Lekha babofule tsimoni tsiabwe baleshe okhulola! Khandi emikongo chiabwe chibetsenje emiteshele buli lwosi.

²⁴Obasundulekhwo lirumalio, khandi obamalilekhwo lirumalio lilulu.

²⁵Tsikambi tsiabwe tsikhoya tsiasikala nitsibulamwo omundu, amaheema kabwe kakhoya kabula oumenyamwo.

²⁶Okhuba basandinjia aba iwe wamala okhuhelesia eshinyasio khale, bameetanga okhusaalisia aba iwe wamala okhusasalisia khale.

²⁷Obahelesie eshiyasio khulwobumayanu bwabwe bwosi, shiolababeelakhwo tsimbabasi tawe.

²⁸Obarusie mushitabu shiabali mwoyo, khandi shiolababasiliakhwo halala nende abalunjishi tawe.

²⁹Nebutswa isie endi mumatinyu khandi esaalilanga, iwe Nyasaye, unjinguule ikulu, umbonie.

³⁰Ndalemba ninditsoomia eliira lia Nyasaye, ndalarumbula obukhongobwe nemukhupila orio muno.

³¹Lino lilachamisia OMWAMI Nyasaye okhushila okhumumalila omusango kwetsiheyi, noho kata tsisurusi tsikhongo.

³²Abasandibungwa balalola kano, nibatsatsahala, nabo abenamilanga Nyasaye balalemibwa emioyo chiabwe.

³³OMWAMI Nyasaye ahabinanga abatakha, ne shiyebililanga abandube bali mumbohe tawe.

³⁴Mwitsoomie Nyasaye inywe likulu nende eshialo, tsinyanza nende biosi ebielemangamwo.

³⁵Nyasaye alahonia Yerusalemu, niyombakha khandi amatookho ka Yuda. Abandube balamenyamwo, ne eshialo eshio shilaba eshiabwe.

³⁶Abetsinzibulo tsiabakhalabanibe bakhalaamilwe eshialo eshio. Nabo abamuheela bakhamenyemwo.