Read wanga TSITSABULI 7 Bible Online

TSITSABULI 7 - wanga bible

TSITSABULI 7

¹Itsabuli ya Daudi, eya yembela OMWAMI Nyasaye okhulondana nende Kushi, owomuluyia lwa Benjamini. Iwe OMWAMI Nyasaye wanje, niwe owa ndilushilanga khulwa obulindwi. Umbonie okhurula mubasuku banje boosi abanondachilanga.

²Noba nolambonia ta, balaarandulamwo ebitonye shinga olwa italanyi yirandulanga, nibaayila ahomundu alanyala okhumbonia ta.

³Iwe OMWAMI Nyasaye wanje, nimba nindonoonelakhwo omundu yesi yesi, nimba nindakhobakhwo omwitsa wanje,

⁴noho nindaseerakhwo omusuku wanje oubula eshikha ninasi, nimba nindakhola kano,

⁵kho lekha omusuku wanje yanondachile mana yanyoole, yasenachile hasi efwe, yandeshe hasi yaho nefwile!

⁶Iwe OMWAMI Nyasaye, buukha mwirumalio, sinjila wikalile liruma liabasuku banje. Buukha Nyasaye wanje, okhuba wamala okhulaka obukhalachi bwa habwene.

⁷Lekha emikanda chiabandu chikhung'ane aha oli, nawe obaruche noli khushifumbishio shioburuchi mwikulu.

⁸OMWAMI Nyasaye, niwe oukhalachilanga abandu boosi eshiina, ukhalachile habwene okhulondokhana nende obulunjishi bwanje, khandi okhulondana nende eshilongoole shianje.

⁹Iwe oli Nyasaye omulunjishi, ouyaasinjia amapaaro nende obwikombi bwefwe, osinjisie obubi bwabandu abamayanu, ne oralisie abalunjishi.

¹⁰Nyasaye niye eshikhumba shianje, abalunjishi mumioyo niye oubahoninjia.

¹¹Nyasaye nomukhalachi weshiina omulunjishi, buli nyanga akhalachilanga abamayanu eshiina.

¹²Omundu naba nalekalukhasia ta, Nyasaye ayiakaale olukangalwe, akhwesile obuyingobwe, yerecheeshe okhulasa.

¹³Akaasiye ebimanulwabie biokhwira, ayiakaale ebiselebie mumulilo.

¹⁴Lolekhwo shinga olwa abamayanu berechekhanga okhukhola amakhuwa amabi, betsuulemwo obukaati, bakhola akobubeeyi.

¹⁵Bayaba obuko mbu, abandu bandi bakwemwo, nebutswa abeene nibo abakwamwo.

¹⁶Obumayanu bwabwe bubakalushila abeene, induli yabwe yibakwila abeene.

¹⁷Ndalakhupila OMWAMI Nyasaye orio khulwa obulunjishibwe, ndaletsoomia eliiralie, OMWAMI Nyasaye, ouli Omukhongo Muno.