Read wanga TSITSABULI 71 Bible Online

TSITSABULI 71 - wanga bible

TSITSABULI 71

¹Iwe OMWAMI Nyasaye, niwe owandilushilangakhwo, shiolafuchilila mbu, ehulwe tawe:

²mubulunjishibwo ukhonye khandi umbonie. Umbulilisie mana umbonie.

³Obe olwanda lwanje lwokhwilushilakhwo, khandi olukoba lwanje lwamaani olwokhumbonia, shichila niwe olwanda lwanje khandi olukoba lwanje.

⁴Nyasaye wanje, uhonokosie okhurula mumakhono kabandu abamayanu, uhonokosie okhurula mubunyali bwabandu ababi khandi abamayanu.

⁵Okhuba iwe OMWAMI Nyasaye, niwe obunaayilo bwanje, niwe owa ndisikanga okhurula muburaaka bwanje.

⁶Niwe owandileetangakhwo okhurula mubwana bwanje, niwe ouniindanga okhurula khunyanga ya ndebulilwakhwo. Ndalakhwitsoominjia buli lwosi.

⁷Obulamu bwanje bwabeelenje eshilolelo khubandu abanji, okhuba iwe OMWAMI Nyasaye, niwe owabeelenje omulindi wanje wamaani.

⁸Ekhwitsoominjia nerumbula oluyalilwo eshiteere tulu.

⁹Shiolandoba mubise biobukofu bwanje buno ta, kata shiolandekha shichila mbu, bulano endi omuteshele tawe.

¹⁰Abasuku banje baboolanga amakhuwa amabi khwisie. Abakhaabanga okhunzira batutanga nibali halala,

¹¹nibaboola bari, “Nyasaye yamuleshile, lekha khumulondachile okhumutiila, shichila abulaho owokhumuhonokosia.”

¹²Iwe Nyasaye, shiolaba ehale okhurula khwisie ta, iwe Nyasaye wanje, itsa bwangu umbabine.

¹³Abanzinjililanga itookho bakhoya bafwimbwa omurwe khandi basasibwa. Abateemanga okhuusaalisia bakhoya bafwimbibwa omurwe, khandi tsisoni tsikhoya tsiabatiila.

¹⁴Nebutswa isie ndalaretsanga obunaayi bwanje mwiwe buli lwosi, ndalakhwitsoominjia obushia nobushia.

¹⁵Ndalaboolanga khukobulunjishibwo, ndalaboolanga khukebikholebio biobuhonia obushia nobushia, kata nibili ebinji okhushila obuchesi bwanje.

¹⁶Iwe OMWAMI Nyasaye, ndalarumbula ebikholebio biamakana, ndalarumbula mbu, niwe wenyene ouli omulunjishi.

¹⁷Wanzechesinjia okhurula mubwana bwanje, nasi eshirumbulanga akebikholebio biamakana.

¹⁸Iwe Nyasaye, kata olwemba nendi omukofu wetsimbutsi, shiolandekha ta, okhuula olwerumbulila abetsinzibulo tsiolunyuma akobunyalibwo.

¹⁹Iwe Nyasaye, obunyalibwo nende obulunjishibwo biulanga hekulu mwikulu, iwe wakhola ebikhole biamakana, oundi shialiho shinga iwe tawe.

²⁰Kata iwe niwarumila amatinyu amanji, olingalusilia obulamu bwanje khandi, olingalusia okhurula hasi mwiloba, iwe olingalusia okhurula mushilindwa khandi.

²¹Wakhaakhole okhuba omukhongo kata okhushilakhwo bulano, wakhaanemie omwoyo khandi.

²²Ndalakhwitsoomia khandi nelitungu, iwe Nyasaye wanje, ndalakhwitsoomia khulwa obwisiikwabwo. Iwe Nyasaye, ndalakhwimbila tsinyimbo tsiokhukhwitsoomia, iwe ouli Omutakatifu wa Isiraeli.

²³Ndalakhupa tsingalakala, nekhwimbila tsinyimbo tsiokhukhwitsoomia, shichila umboniiye.

²⁴Ndalaboola khukobulunjishibwo eshiteere tulu, shichila abandu bakhaabanga okhuusaalisia bahulilwe khandi bafwimbiibwe omurwe.