Read wanga TSITSABULI 72 Bible Online

TSITSABULI 72 - wanga bible

TSITSABULI 72

¹Iwe Nyasaye, onyalile omuruchi okhukhalaka eshiina habwene, khandi ohelesie omusiani womuruchi obulunjishibwo.

²Omuruchi akhoya yaruka abandubo mubulunjishi, khandi akhoya yaruka abamanani munjila ya habwene.

³Esaaya mbu, tsingulu tsireerere abandubo obuyinda obunji, nabio ebikulu bibareerere obulunjishi.

⁴Omuruchi akhoya yakhalachila abamanani eshiina habwene, khandi akhoonye abatakha, mana amulule abasandinjia!

⁵Esaaya mbu, omuruchi ayindile shinga eliuba, khandi ayindile shinga omwesi inziayo.

⁶Omuruchi akhoya yaba shinga ifula eyikwa mumukunda khubunyaasi bwomuboka, akhoya yaba shinga ifula eyinyisia omukunda.

⁷Obulunjishi bukhoya bwatswana mushialo muburuchibwe bwosi, khandi omulembe kukhoya kwetsula mushialo okhuula olwa omwesi kukwa.

⁸Oburuchibwe bukhoya bwachaachila khunyanza okhuula khunyanza yindi, bukhoya bwachaachila khumwalo kwa Efurate okhuula khundulo weshialo!

⁹Abandu bamenyanga mushitsiimi balenamila omuruchi, abasukube balakwa hasi nibakhomba olufu.

¹⁰Abaruchi ba Tarishishi nende abamenyanga mubikhalachinga biomunyaza bakhoya bamurunga obushuru, nabo abaruchi ba Sheba nende aba Seba bakhoya bamureerera ebihaanwa.

¹¹Abaruchi boosi bakhoya bamwinamila, abamahanga komushialo koosi bakhoya bamukhalabanila.

¹²Tooto ahonokosinjia abatakha abamuhabila, kata abamanani nende ababisandu boosi.

¹³Alolelanga abateshele nende abamanani tsimbabasi, khandi ahoninjia abatakha.

¹⁴Abahonokosinjia okhurula mukhusandibwa nende mumaraba, okhuba obulamu bwabwe nobwobukusi muno khuye.

¹⁵Omuruchi akhoya yayindila! Akhoya yahebwa itsahabu okhurula Sheba, abandu bakhoya bamusaayilanga buli lwosi; khandi akhoya yasaayilungwa tsikhabi okhurula khu Nyasaye buli lwosi.

¹⁶Imele yikhoya yabaho mushialo inyinji, obutenje bwebikulu bukhoya bwetsulakhwo ebiraache, biame obulayi shinga ebia Lebanoni. Abandu bakhoya betsula mumatookho shinga obunyaasi bwokhushialo.

¹⁷Eliira liomuruchi likhoya liatsiililila okhwitsulilwa inziayo, ne ifumaye yikhoya yatsiililila okhubaho shinga eliuba. Abamahanga koosi bareebe Nyasaye okhubahelesia tsikhabi shinga olwa yahelesia omuruchi.

¹⁸OMWAMI Nyasaye, Nyasaye wa Isiraeli yetsoomibwe, niye yenyene oukholanga ebikhole biamakana.

¹⁹Eliiralie lioluyali litsoomibwe inziayo, ne oluyalilwe lwitsule mushialo shiosi! Amina khandi Amina!

²⁰Amasaayo ka Daudi, omusiani wa Yese yasaaya kaakamila yano.