Read wanga TSITSABULI 73 Bible Online

TSITSABULI 73 - wanga bible

TSITSABULI 73

¹Tooto mwene Nyasaye nomulayi khubalunjishi, nomulayi khubemioyo emieleleshe.

²Nebutswa isie ndali nendi ahambi okhukosia itswoni yanje, obusubili bwanje bwali nibuli ahambi okhuhwa,

³shichila ndatiilwa imbalikha, olwa ndalola amakhuwa kabamayanu nikatsiililanga obulayi.

⁴Emibili chiabwe shichilasaalilangakhwo ta, bali namaani khandi bakaasa butswa emibili.

⁵Shibanyakhanangakhwo shinga olwa abandu bandi banyakhananga tawe. Kata shibalikhwo namatinyu shinga abandu bandi tawe.

⁶Khulweshio isunga yabwe yilolekha habulafu shinga omukasa olunyolo lweitsahabu mwikosi liabwe, nako amahababa kabwe kali shinga tsingubo tsia befwalile.

⁷Emioyo chiabwe chiitsuulemwo amapaaro kobwonooni, amapaaro kabwe kerechekhanga okhukhola obumayanu.

⁸Batseshelelanga abaashiabwe nibarechekha okhukhola akobwonooni, bechinjimisinjia nibasioma okhusandia abaashiabwe.

⁹Baboolanga akobwonooni khu Nyasaye ouli mwikulu, khandi bahaananga amalako amalulu khubandu.

¹⁰Kho kata abandu ba Nyasaye babashiukhanila nibafuchilila koosi akabababoolela.

¹¹Baboolanga bari, “Tooto mwene Nyasaye shialamanyakhwo ta, ouli Omukhongo Muno shiamanyilekhwo akakhukholanga tawe.”

¹²Nolwa abamayanu bali bario, bali nemiandu eminji khandi chimeetekhanga buli lwosi.

¹³Khane ndiliindanga butswa mubweleleshe khulwa butswa, nindaloonoona ta?

¹⁴Enyakhananga eshiteere tulu, buli lwosi umbetsanga eshinyasio.

¹⁵Nemba nindaboola amakhuwa shinga yako, shindakhabeele nenjendanga shinga mulala wokhubandubo tawe.

¹⁶Nebutswa olwa ndayililisia khumakhuwa tsana ako, kandoleshela okhuba amatinyu,

¹⁷okhuula olwa ndenjila muhekaluyo, kho nemanyilisia eshiliikholekha khubamayanu mubumalilishi:

¹⁸Iwe obareetsanga habundu harerere, khandi obakwisinjia mubusasishi!

¹⁹Basasibwa habwene nahabwene, nibamululilwa elala namariisia kokhufwa.

²⁰Bali shinga amalooro akakhamulukhanga mumabwibwi, olwomundu asisimukha, kebililungwa.

²¹Olwa omwoyo kwanje kwali nikuluyiliile, nendi nobusaalilu obululu mwisie mukari,

²²ndali omusilu shinga isolo nabulimo, nindalakhumanyilisia tawe.

²³Nebutswa embetsanga ninawe buli lwosi, nawe undiilanga omukhono kwanje omusaatsa.

²⁴Iwe unzimililanga nameebaaloko, ne olunyuma wakhanzinjisie muluyali.

²⁵Niwiina oundi owa endi ninaye mwikulu nolali iwe? Olwa endi ninawe, eshindu shibulaho khushialo eshia ndikomba tawe.

²⁶Omubili kwanje nende omwoyo kwanje binyala okhuhwa amaani, nebutswa Nyasaye niye amaani kanje niye omukabo kwanje inziayo.

²⁷Emanyile obulayi mbu, abakhulekha iwe balasikha, olasishia boosi abalakhuhulilanga tawe.

²⁸Nebutswa khulwanje nobulayi okhusitanga ahambi khu Nyasaye, ndakholile OMWAMI Nyasaye okhuba obwilushilo bwanje, mbu erumbulenje akebikholebie koosi.