Read wanga TSITSABULI 74 Bible Online

TSITSABULI 74 - wanga bible

TSITSABULI 74

¹Iwe Nyasaye mbushiina nokhwibala butswa orio? Olatsiililila okhukholela abandubo beene liruma inziayo noho?

²Witsulile abandubo abomwene weyahulila okhurula khale, oluyia lwa warusia mumbohe okhuba olulwo omwene. Witsulile eshikulu shia Zayuni, ewa iwe wamenyanga.

³Chendakhwo khumachinjini ako, abasuku befwe basasiye buli shindu muhekalu.

⁴Abasukubo bekhoyile nibakhupa tsingalakala muhekaluyo khulwobuhuli, basimiishemwo tsipendera tsiabwe okhuba eshilolelo shiobuhuli bwabwe.

⁵Bali shinga abandu abaasiachi betsikhwi, abaremanga emisaala netsihaywa tsiabwe nibachikwisia.

⁶Bafunaka emiliango chieihekalu, nibekhoonyela tsihaywa nende tsinyundo tsiabwe.

⁷Basasia ihekaluyo nende okhuchisamba nomulilo, bafwabia habundu ahabandu betsanga nibenamila iwe.

⁸Bali nelichomo liokhumulula ifwe fwesi, nibasamba buli habundu hatakatifu mushialo.

⁹Shikhulolanga ebimanyisio biefwe ebitakatifu ta, omulakusi yesi yesi shialiho khandi ta, khandi abulaho mwifwe oumanyile mbu amatinyu kano koosi kakhatsiililile kari okhuula liina tawe.

¹⁰Iwe Nyasaye, abasuku befwe balakhutseshelela iwe okhuula liina? Balatsiililila okhunyeka eliiralio emiyika chiosi noho?

¹¹Mbushiina nolakhuhabina? Mbushiina nolanyiila omukhonokwo okhukhuhabina ifwe?

¹²Kata kario iwe Nyasaye, niwe omuruchi wefwe okhurula khale, wakhunyalila okhuhula amahe amanji mushialo shiefwe.

¹³Mubunyalibwo obukhongo, waarasiamwo inyanza hakari, nosasaka emirwe chiemiyokha emikhongo chiomunyanza.

¹⁴Wasasaka emirwe chia Lewiatsani, okusolo okukhongo kwomunyanza, nokukhola okhuba eshiokhulia shietsisolo tsiomushitsiimi.

¹⁵Wakhola tsisebele nende emichela okhurusia amaatsi, nokhamia emialo emikhongo echilakhamanga tawe.

¹⁶Iwe walonga eshiteere nende eshilo, noraho eliuba nende omwesi.

¹⁷Waara tsinzakho tsieshialo, noraho tsinyanga tsieshimiyu nende etsiomunyiri.

¹⁸Nebutswa iwe OMWAMI Nyasaye, witsulile mbu, abasukubo bakhutseshelelanga, witsulile mbu, abandu abo nabasilu, shibakhumanyile iwe ta, khandi bakhuchayanga iwe.

¹⁹Shiolebala abandubo abateshele khubasuku babwe abalulu ta, shiolebilila abandubo abasandibungwa tawe.

²⁰Witsulile indakanoyo eya wakaasia ninefwe. Induli yili buli habundu mushialo aheshiilima shili.

²¹Shiolafuchilila abandu basandibungwa bafwimbibwa omurwe ta, oleshe abamanani nende abatakha betsoomie eliiralio.

²²Iwe Nyasaye, buukha ololosie obwatooto bwobukhalachibwo bwa habwene, witsulile shinga olwa abandu abasilu bano bakhutseshelelanga iwe buli lwosi.

²³Shiolebilila olukhu lweliruma lwabasukubo, kata oluyoka lwabasukubo bakholanga obushia nobushia tawe.