Read wanga TSITSABULI 75 Bible Online

TSITSABULI 75 - wanga bible

TSITSABULI 75

¹Khumurereesi wetsinyimbo; okhwimbilwa mumayoosi ka “Shimulasasia ta.” Itsabuli ya Asafu. Olwimbo. Iwe OMWAMI Nyasaye, khukhuupila orio muno, tooto khukhuupila orio muno. Khurumbula obukhongobwo, nende ebikholebio biamakana biawakhola.

²Nyasaye aboola ari, “Isie ndaraho ebise bia ndakhayaasie abandu, ne ndakhabayaasie munjila ya habwene.

³Kata olwa buli shindu shili mwoyo shitechela, eshialo nashio nishirenga, isie omwene ndalaralisia omuse kwashio.

⁴Emboolelanga abechinjimisi mbu, baleshe injinia, ne abamayanu mbu, baleshe okhwichinjimisia.

⁵Shimulechinjimisia, noho kata okhwiyitsiala tawe.”

⁶Okhuba obukhalachi bweshiina shiburula Ebukwe noho Mumbo, kata shiburula Emasaba noho Emulambo tawe.

⁷Habula burula khu Nyasaye mwene, ouchinguulanga balala, ne natuutuyia abandi.

⁸OMWAMI Nyasaye atiilile eshikombe mumukhonokwe, eshitsuulemwo idivai indulu yoburumabwe. Alachitsukhulula hasi nabamayanu boosi balachinywa okhuula olwa yihwa yoosi pe.

⁹Nebutswa isie ndalekhoya obushia nobushia, ndalemba ninditsoomia Nyasaye wa Yakobo.

¹⁰Alasasia obunyali bwabamayanu bwosi, nebutswa obunyali bwabalunjishi bulameetekha.