Read wanga TSITSABULI 76 Bible Online

TSITSABULI 76 - wanga bible

TSITSABULI 76

¹Nyasaye yamanyikha mushialo shia Yuda, ne eliiralie lihebungwa oluyali mu Isiraeli.

²Eshimenyoshie shili mwitookho lia Yerusalemu ne yamenya khushikulu shia Zayuni.

³Yaho niho ahayafunachila obuyingo bwabasuku, nafunaka ebikhumba nende tsinganga tsiabwe, nende ebimanulwa bielihe biabwe biosi.

⁴Iwe Nyasaye oli owoluyali khandi wobukoosia, okhushila ebikulu bieinziayo.

⁵Abalwani babwe abachesi banuulilwe biosi ebiababele ninabio, ne bulano boosi bafwile, amaani kabwe nende amachesi kabwe kabula inganga.

⁶Iwe Nyasaye, owa Yakobo yenamilanga, olwa wabasiomela, netsifarasi nende abetsilushilangakhwo nibakwa hasi nibafwile

⁷Nebutswa iwe OMWAMI Nyasaye, abandu boosi bakhuria abulaho ounyala okhusinjila imbeliwo olwa oba noli noburuma.

⁸Warumbula obukhalachibwo okhurula mwikulu, ne eshialo nishiria khandi nishiholeela tsi,

⁹olwa wabuukha norumbula obukhalachibwo, nokhuhonia abasandibungwa boosi khushialo.

¹⁰Iwe Nyasaye okholanga abandu bali noburuma okhukhwitsoomia kata okhushila, kata abehonokokhanga mwihe balakhwinamila khutsinyanga tsiamasabo.

¹¹Muhelesie OMWAMI Nyasaye wenywe eshiamwetsuba okhumuhelesia, Mureere ebihanwa inywe amahanga kali ahambi khuye koosi. Niwe owokhuribwa.

¹²Otitiyinjia abaruchi abechinjimisinjia norusiaho abaruchi abakhongo bokhushialo