Read wanga TSITSABULI 78 Bible Online

TSITSABULI 78 - wanga bible

TSITSABULI 78

¹Inywe abandu banje, rechelesie obwibali bwanje, reche amarwi khumakhuwa komunwa kwanje!

²Enzia okhuboolela mutsinjelo nindechesia eminehe chiakhale,

³Amakhuwa akakhwahulila khandi aka khwamanya akabakuuka befwe bakhwechesia.

⁴Shikhulakabisa okhurula khubaana befwe ta, khulakaboolela khubolwibulo lulondakhwo, akobunyali bwa OMWAMI Nyasaye nende ebikholebie biamakana, kata nende amakhuwa kamakana kayakhola.

⁵Yahelesia abandu ba Isiraeli amalako, nahana amalachilisio khubolwibulo lwa Yakobo. Yalachilisia abakuuka befwe okhwechesia amalako ako khubaana babwe

⁶Kho mbu abolwibulo lulondakhwo bakamanye, nabo khandi bechesie abaana babwe.

⁷Munjila eyo boosi khandi bare obunaayi bwabwe mu Nyasaye, ne baleshe okhwibilila aka yakhola habula balonde amalakoke buli lwosi.

⁸Baleshe okhuba shinga abakuuka babwe abali abakhayi khandi abolwibulo lulahulilanga amalako ta, khandi abobusuubili bwabwe bularalila mu Nyasaye ta, khandi shibasuubila muye tawe.

⁹Abolwibulo lwa Efuraimu nibabaale obuyingo bwabwe, belukha khunyanga yelihe.

¹⁰Shibalinda indakano ya Nyasaye ta, khandi shibalonda lilakolie tawe.

¹¹Bebilila aka yali niyakhola nende kata akamakana ka bali nibalola nakhola.

¹²Abakuuka babwe balola akamakana ka yakhola, nibali mushialo shia Misiri, mulukongo lwa Zoani.

¹³Yakabukhasia inyanza, nabo nibabiramwo, yakhola amaatsi okhusinjila shinga lisiisi

¹⁴Mushiteere yabemilila nelileesi; ne mushilo yabemilila nobulafu bwomulilo.

¹⁵Yaraka tsinyanda mushitsiimi, nabahelesia amaatsi kokhunywa okhurula mulwanda.

¹⁶ Yakhola tsisebele okhurula mulwanda khandi nakhola amaatsi okhukholomokha shinga omuchela.

¹⁷Nebutswa batsiililila okhwonoonela Nyasaye, nibakholela oweikulu muno induli.

¹⁸Bateema Nyasaye mumioyo chiabwe, khulwa okhureeba mbu bahebwe ebiokhulia biabekomba.

¹⁹Bafukula Nyasaye nibaboola bari, “Mana Nyasaye anyala okhukhuhelesia eshiokhulia mushitsiimi?

²⁰Toto yaaraka olwanda amaatsi nikarulamwo shinga omukhula, nebutswa anyala okhukhuhelesia obusuma, noho kata okhuhelesia abandube inyama?”

²¹Khulweshio, olwa OMWAMI Nyasaye yahulila ako, yasinyikha, ne naseera abandu ba Isiraeli nomulilo, oburumabwe khubo nibumeetekha khubo,

²²okhuba shibali nobusuubili muye ta, khandi shibasuubila mbu anyala okhubahonia tawe.

²³Nebutswa yalachilisia likulu, nilikula emiliango chialio.

²⁴Yabakwisilia imana shinga ifula mbu balie nabahelesia imele yomwikulu.

²⁵Kho abandu nibalia khumukaate kwabamalaika Nyasaye yabahelesia ebiokhulia mubunji.

²⁶Khandi yakhola omuyeka omukhongo kwebukwe okhuhutsa ikulu wabwe, ne khulwobunyalibwe yabuusia omuyeka kwemulambo.

²⁷Ne mubunyalibwe yahutsia omuyeka kwomumbo, nakwisilia abandube tsisindu tsinyinji shinga olufu khandi shinga omuyeshe kwomunyanza.

²⁸Tsiakwa hakari weikambi yabwe, nitsibotokhana amaheema kabwe koosi.

²⁹Abandu balia nibekura shichila Nyasaye yabahelesia eshia bali nibekombile okhulia.

³⁰Nebutswa bali nibashili okhwikusia obwikombi bwabwe, nibashilitsanga eshiokhulia eshio,

³¹ne Nyasaye nabatililwa oburuma, niyera abandu babwe bamani, abali abaraka ba Isiraeli.

³²Ne kata olunyuma lwokhubakholela kano koosi abandu abo batsiililila butswa okhwonoona, kata olunyuma lwokhubakholela akamakana shibamusuubilila tawe.

³³Kho yakamia tsinyanga tsiobulamu bwabwe shinga omuya, namala emiyika chiobulamu bwabwe namasila ka matetekhana.

³⁴Olwa yeeranga abandi khubo, abasikalanga bamukalukhanilanga, bekalukhasinjia nibamwinamila nomwoyo kwosi.

³⁵Betsulilanga mbu Nyasaye niye olwanda lwabwe, Nyasaye omukhongo muno niye omuhonia wabwe.

³⁶Nebutswa amakhuwa kabwe koosi kali butswa akobubeeyi, libulaho eliababoola liobwatoto tawe.

³⁷Shibamuhulila ta, khandi shibalinda indakano yabwe ninaye tawe.

³⁸Nebutswa Nyasaye yatililwa abandube eshisa nabaleshela obumayanu bwabwe, ne nalabasishia tawe. Akhandi nakhandi yatila oburumabwe nalayakulula obululubwe bwosi tawe.

³⁹Yetsulila mbu bali butswa abandu nabandu abafwitsanga. Bali shinga omuyeka okubira neshikukalukha khandi tawe.

⁴⁰Akhandi akhanji bamukholela induli mushitsiimi nibamusinyisia mushitsiimi eshio.

⁴¹Akhandi nakhandi bateema Nyasaye, nibamusinyisia Nyasaye Omutakatifu wa Isiraeli.

⁴²Bebilila obunyalibwe, nende inyanga ya yabahonokosia okhurula khubasuku babwe;

⁴³Olwa yakhola ebikhole biamani nende akamakana, mumukunda kwa Zoani mushialo shia Misiri.

⁴⁴Yakalukhasia emialo nichikwa amatsayi, ne Abamisiri shibali namaatsi kokhunywa tawe.

⁴⁵Yaruma olucheka lwamabuko mubo, nako nikabaluma obubi muno. Naruma amashele nikabamulula.

⁴⁶Yaruma tsisiche nitsilia ebiokhulia biabwe khandi nitsisasia emikunda chiabwe.

⁴⁷Yaruma ifula yamachina niyisasia emitsabibu chiabwe nayo itsaluji niyisasia emiseituni chiabwe.

⁴⁸Ifula yamachina eyo yakhupa tsing'ombe tsiabwe nitsifwa, khandi likulu nilikhupa ebiayo biawe.

⁴⁹Yabasukunila obululu bwoburumabwe, noburasi, nobusinyishi, namasila, ebietsa shinga omukanda kwabamalaika bamululanga.

⁵⁰Shiyayekalila oburumabwe noho kata okhuhonokosia obulamu bwabwe ta, habula yabeera okhubirila mumasila.

⁵¹Yeera abasiani abekulanda bomutsinzu tsia Abamisiri boosi.

⁵²Mana niyemilila abandube shinga omwayi, nabemilila okhubira mushitsiimi.

⁵³Yabemilila obulayi, ne shibaria ta, habula inyanza yamila abasuku babwe.

⁵⁴Mana nabareera mushialoshie eshitakatifu, eshialo shiebikulu shiomwene yali nabukuule

⁵⁵Yalonda amahanga keshialo eshio, ne abandube nibenjilamwo. Yakabula eshialo eshio khutsimbia tsia Abaisiraeli ne amataala kamahanga ako nahelesia abandube okhumenyamwo.

⁵⁶Nebutswa bakholela Nyasaye Omukhongo Muno induli nibamuteema; Shibalinda amalakoke tawe.

⁵⁷Habula bashiukhana inyuma nibakhola obukhobani shinga abakuuka babwe, bashiama shinga obuyingo obushiamu.

⁵⁸Basinyisia OMWAMI Nyasaye nende okhwinamila khwabwe khwebifwanani, khandi nibamukhola okhutiilwa neimbalikha khulwa okhwinamila abanyasaye bandi.

⁵⁹Olwa Nyasaye yamanya likhuwa elo, yatilwa noburuma obululu, ne nalobela elala abandube

⁶⁰Yalekha eshimenyoshie Shilo,[5] Liheema lia yali niyamenyamwo hakari wabandu.

⁶¹Yalekha abasuku bafwe nibabukula lisanduku lieindakano, eliali eshilolelo shioluyalilwe

⁶²Yatililwa abandube oburuma obululu, nalekha niberwa nabasuku babwe.

⁶³Abasaatsa babwe bafwila mwihe, nikachila abakhaana babwe nibalateshibwa tawe.

⁶⁴Abesaaliisi babwe bafwa khulwa olukanga, ne abakhasi aba balekha nibalanyala okhubekhula ta.

⁶⁵Mana olunyuma OMWAMI Nyasaye nabuukha shinga ourula mundoolo, shinga omusaatsa wamani oulokha khulwa idivai yanywele.

⁶⁶Yahukhasia abasukube nibakalukha inyuma nabahula mushifwimbwa murwe.

⁶⁷Nebutswa yaloba abolwibulo lwa Yosefu nalalola oluyia lwa Efuraimu tawe.

⁶⁸Mushilenje shialwo yalobola oluyia lwa Yuda; nende eshikulu shia Zayuni eshia yaheela.

⁶⁹Habwene yaho yombakhaho Ihekaluye shinga litaalalie elili mwikulu, nachisimikha shinga olwa yasimikha eshialo khulwemiyika chiosi.

⁷⁰Yalobola Daudi omukhalabaniwe, namurusia mushiayo,

⁷¹ewa yali niyayanga amakondike; mana namukhola omuruchi wabandu ba Isiraeli, khandi omwayi wabandube.

⁷²Daudi yabalinda nomwoyo kweshilongole, nabemilila nobusitsa.