Read wanga TSITSABULI 80 Bible Online

TSITSABULI 80 - wanga bible

TSITSABULI 80

¹Iwe omwayi wa Isiraeli, khurecheresie, khurecheresie iwe owimililanga eshiayoshio. Iwe owikhaale khushifumbishio shioburuchi hekulu webilonje bietsimbaha,

²wifwimbule khuboluyia lwa Efuraimu, Benjamini nende Manase. Khumanyie amaniko mana witse okhuhonie.

³Iwe Nyasaye khukalusie habwene, khulolele eshisa mana okhuhonie.

⁴Iwe OMWAMI Nyasaye omwene mahe, olasinyishila amasaayo kabandubo okhuula liina?

⁵Wakholile eshibela okhuba eshiokhulia shiefwe, nokhukhola okhunywa amasika amanji.

⁶Walekha amahanga karondokhane ninefwe okhukhuchaaya, nokhola abasuku befwe okhukhutseshelela.

⁷Iwe Nyasaye omwene mahe, khukhusaaya mbu okhukalusie habwene, khulolele tsimbabasi mana okhuhonie.

⁸Iwe warusia omutsabibu mushialo shia Misiri, nolonda amahanga kandi mana nokuraka mushialo shiabwe.

⁹Wakukasilia liloba mbu kukhule, nikunyiila emisi hasi mana nikutarala eshialo shiosi.

¹⁰Eshinikha shiakwo shiafunikha ebikulu, nako amasaka kakwo nikaralila okhushila emisiita emikhongo.

¹¹Amasaka kakwo kalaanda okhuula khunyanza ya Mediterenia, nachio emisi chiakwo nichiula khumwalo kwa Yufurate.

¹²Mbushiina nosasia lisisi liali niliakubotokhana? Bulano omundu yesi oubiraho anyala okhwiba ebiamo biakwo.

¹³Tsimbitsi tsiomubulimo tsikusasinjia, tsisolo tsiomubulimo nitsikuliakhwo.

¹⁴Iwe Nyasaye omwene mahe khushiukhanile, khuhenjekhwo okhurula mwikulu, yitsa okhuhonie ifwe abandubo.

¹⁵Yitsa ohonie omutsabibu kwa waraka, omutsabibu omutoro kwa wakhola okhuralila.

¹⁶Abasuku befwe bakuremaache nende okhukusamba nomulilo, obahenjekhwo muburumabwo obululu mana obasasie.

¹⁷Nebutswa olinde abandu ba waahula omwene, lihanga lia wakhola okhuba eliamani.

¹⁸Shikhulishiukhanakhwo khandi nikhurula khwiwe tawe, khulamusie nefu khulakhwitsoomia.

¹⁹Iwe OMWAMI Nyasaye, omwene mahe, khukalusie habwene, khulolele tsimbabasi mana okhuhonie.