Read wanga TSITSABULI 81 Bible Online

TSITSABULI 81 - wanga bible

TSITSABULI 81

¹Yimbile Nyasaye ouli amaani kefwe nomwoyo omukhongo, khupile Nyasaye wa Yakobo tsingalakala!

²Remwo olwimbo, nimukhupa manyanga, khupe lichieng'i nende litungu.

³Khupe olwika khulwa lisabo, olwa omwesi kuba nikushili omutoro, nende olwa kuba nikulabile.

⁴Okhuba lino nililako mu Isiraeli, khandi lilachilisio okhurula khu Nyasaye wa Yakobo.

⁵Yalihaana khubandu ba Isiraeli, olwa yaseera eshialo shia Misiri. Embulilanga omwoyo kwa lamanyile nikuboola kuri;

⁶“Ndarusia emisiko emisiro khumikongo chienywe, khandi ndamurusia khumilimo emisiro chiamatofali.

⁷Olwa mwali mubutinyu, mwahabila nasi nemununula, ndamuhabina nendi habundu wanje hokhwifisa. Ndamuteema hamatsi ka Meriba.

⁸Inywe abandu banje, recheresie olwa emuchetsiyia. Iwe Isiraeli ndakhekombile warecheresia.

⁹Shimulenamilakhwo abanyasaye bandi ta, kata okhuhelesia oluyali omunyasaye undi yesi yesi tawe.

¹⁰Nisie OMWAMI Nyasaye wenywe, owamurusia mushialo shia Misiri. Mwasamie eminwa chienywe nasi ndalamwikusia.

¹¹“Nebutswa abandu banje shibayarecheresia ta, Abaisiraeli shibayambulila tawe.

¹²Kho ndabalekha balonde obukhayi bwemioyo chiabwe, nende okhukhola shiosi eshia abeene benya.

¹³Ndakhekombile abandu banje barecheresiakhwo, mbu Abaisiraeli bachende munjila tsianje.

¹⁴Ndakhahulile bwangu abasuku babwe, nende okhubamululila elala.

¹⁵Abo abaasila isie bakhanzinamile khulwa oburi, nasi ndakhabahelesiye eshinyasio inziayo.

¹⁶Nebutswa inywe ndakhamulisiye ingano inyushe, nemukhola okhwikura nobuushi.”