Read wanga TSITSABULI 85 Bible Online

TSITSABULI 85 - wanga bible

TSITSABULI 85

¹OMWAMI Nyasaye, iwe wabeela eshialoshio tsimbabasi, nokhola abandu ba Isiraeli okhuyindihala.

²Waleshela abandubo obumayanu bwabwe, nobaleshela obwonooni bwabwe bwosi.

³Warusiaho lirumalio lilulu, nolekha okhusinyikhakwo.

⁴Iwe OMWAMI Nyasaye, omuhonia wefwe, khukalusie habwene, ne orusieho obusinyishibwo khwifwe.

⁵Nokhakhutililwe oburuma obushia nobushia noho? Oburumabwo khwifwe shibulahwaho ta noho?

⁶Okhukhole khube abamani khandi, nefu ifwe abandubo khulakhwitsoomia.

⁷OMWAMI Nyasaye khumanyisie obuheelibwo oburalilu, mana okhuhonie.

⁸Lekha bulano ereche eshirwi okhuhulila aka OMWAMI Nyasaye aboola, okhuba alaboolela abandube akomulembe, khubandube abalunjishi abamuhulilanga.

⁹Toto mwene ali ahambi okhuhonia abamwinamilanga, ne oluyalilwe lulabaho mushialo shiefwe.

¹⁰Obuheeli oburalilu nende obwisiikwa bilabukaana, nabwo obulunjishi nende omulembe bilafumbeelelana.

¹¹Obwisiikwa bwomundu bularula hasi khushialo, nabwo obulunjishi bwa Nyasaye bulekha okhurula mwikulu.

¹²OMWAMI Nyasaye alakhuhindihasia, nalio liloba liefwe lilakhuhelesia lichesa lilayi.

¹³Obulunjishi bulemila imbeli wa OMWAMI Nyasaye, nibumukasilia injila.