Read wanga TSITSABULI 86 Bible Online

TSITSABULI 86 - wanga bible

TSITSABULI 86

¹Reka eshirwi iwe OMWAMI Nyasaye, ohulile okhuhaaba khwanje, okhuba isie endi omuteshele khandi omutakha.

²Olinde obulamu bwanje, okhuba isie endi omuholo, umbonie shichila endi omukhalabaniwo owisikanga mwiwe.

³Niwe Nyasaye wanje, khulweshio undolele tsimbabasi. Esayanga khwiwe eshiteere tulu.

⁴Sangasia omukhalabaniwo shichila amasaayo kanje katikulukhanga khwiwe.

⁵Iwe OMWAMI Nyasaye oli omulayi khwifwe khandi ochamanga okhukhuleshela obwonooni bwefwe. Ololesinjia obuheelibwo oburalilu khubandu boosi abasaayanga khwiwe.

⁶Iwe OMWAMI Nyasaye recheresia okhusaaya khwanje, hulila okhuhaba khwanje khulwa obuhabinwi.

⁷Mutsinyanga tsiamatinyu kanje, ehabilanga iwe shichila ohulilanga amasaayo kanje.

⁸Omunyasaye undi shialikhwoho ouli shinga iwe, kata owakhola ebikhole shinga bia iwe wakhola tawe.

⁹Amahanga koosi akawaraho, kaletsa nikakhwinamila, kaletsoomia eliiralio.

¹⁰Iwe oli omukhongo khandi okholanga akamakana. Iwe wenyene niwe Nyasaye.

¹¹OMWAMI Nyasaye unzechesie injilayo, mbu enjende mubwatotobwo. Ukhole okhukhuhelesia oluyali nomwoyo kwanje kwosi.

¹²Ndalakhukhupila orio iwe OMWAMI Nyasaye, nomwoyo kwanje kwosi, khandi ndaletsoominjia eliiralio inziayo.

¹³Obuheelibwo oburalilu nobunji khwisie, wambonia isie okhurula mung'ani.

¹⁴Abandu beisunga betsanga okhunzinjilila, omukanda kwabandu bamahababa bakhabanga obulamu bwanje, abandu abalakhuritsanga iwe tawe.

¹⁵Nebutswa iwe OMWAMI Nyasaye, oli Nyasaye wetsimbabasi khandi owobukoosia, shiosinyikhanga bwangu ta, oli oweshisa khandi omusuubilwa.

¹⁶Shiukhana undolele tsimbabasi, umbelesie amaani isie omukhalabaniwo, umbonie isie omwana womukhalabaniwo weshikhasi.

¹⁷Umanyie eshilolelo shiobukoosiabwo khwisie, kho abo abaasila isie bafimbwe omurwe, okhuba iwe OMWAMI Nyasaye wahabina khandi niulemia omwoyo.