Read wanga TSITSABULI 88 Bible Online

TSITSABULI 88 - wanga bible

TSITSABULI 88

¹Iwe OMWAMI Nyasaye wanje, ekhuhabilanga eshiteere tulu, ne mushilo elaanjilisia imbeliwo.

²Hulila amasaayo kanje, reka eshirwi ohulile okhuhaba khwanje.

³Amatinyu amanji kangwiliile, ne endi ahambi okhufwa.

⁴Endi butswa shinga omundu ouli ahambi okhutsia emakombe, embulakhwo amaani koosi koosi tawe.

⁵Endi butswa shinga owebalwa mubafu, shinga owiriirwe olwa akona mushilindwa, shinga owamala okhwibililwa elala, oulanyala okhuhaabinwa khandi tawe.

⁶Iwe OMWAMI Nyasaye, wafuuba isie hasi muno mushiilindwa, mubuko obuli hasi muno mushiilima.

⁷Lirumalio lisitoheele muno, nako amarundako kasandiiye.

⁸Iwe wakholile abetsa banje okhunzilukha, engwiile eshisinyo khubo ndikalilwe mukari, ne shienyala okhwilukha tawe.

⁹Tsimoni tsianje shitsinyala okhulola ta, khulwa amatinyu kanje. OMWAMI Nyasaye, buli nyanga ekhuhabilanga, nenjinga amakhono kanje ikulu nesaaya.

¹⁰Iwe okholelanga abafu akamakana. Abafu, abeene babuukhanga nibakhwitsoomia.

¹¹Akobuheelibwo oburalilu kaboolungwakhwo mubilindwa? Kata akobulunjishibwo habundu hobusasishi?

¹²Akamakanako shikalolekhanga habundu hokhutiba? Kata obulayibwo mushialo shieshibililwa?

¹³Nebutswa isie OMWAMI Nyasaye, ehabilanga iwe, buli mumabwibwi esayanga khwiwe.

¹⁴OMWAMI Nyasaye eshichilanga niundoba nishiina? Mbushiina obisanga obwenibwo okhurula khwisie?

¹⁵Ndanyakhana okhurula obwana bwanje, khandi endi ahambi okhufwa, obusiro bwebinyasiobio bunjonyiiye.

¹⁶Lirumabwo lilulu liyombeleele, amarisiako amakhongo kaasasiiye.

¹⁷Kambotokhananga eshiteere tulu shinga amaatsi komukhula, kafumbiilekhwo tsimbeka tsiosi.

¹⁸Okholile abaheelwa banje nende abetsa banje okhusita ehale ninasi, eshilima nishio omwitsa wanje.