Read wanga TSITSABULI 89 Bible Online

TSITSABULI 89 - wanga bible

TSITSABULI 89

¹Iwe OMWAMI Nyasaye, ndalemba ninditsoomia obuheelibwo oburalilu. Ndalarumbula obwisikwabwo obushia nobushia.

²Emanyile mbu obuheelibwo oburalilu, bulabetsangaho inziayo, nabwo obwisikwabwo bwaralila shinga likulu.

³Iwe waboola ori, “Ndakhola indakano nende omulobole wanje, ndetsubila Daudi omukhalabani wanje nemboola endi,

⁴‘Owomulwibulolwo alabetsanga omuruchi buli lwosi, nasi ndililinda oburuchibwo ebisoni nebisoni.’ ”

⁵Likulu litsoominjia akamakana kokholaga, ne ebilonjebio ebitakatifu bitsoominjia obwisikwabwo iwe OMWAMI Nyasaye.

⁶Okhuba niwiina mwikulu ounyala okhuchelasibwa nende OMWAMI Nyasaye? Niwiina khubilonje biomwikulu ouli shinga OMWAMI Nyasaye?

⁷Iwe wariibwa mumukhung'ano kwebilonje ebitakatifu, biosi bisinjilanga imbeliwo khulwa okhukhuhelesia oluyali.

⁸Iwe OMWAMI Nyasaye, omwene mahe, niwiina owamaani shinga iwe? Iwe oli omwisiikwa mubindu biosi.

⁹Iwe orukanga kata tsinyanza tsiamarunda amakhongo, oholelesinjia amarunda katsio amakhongo.

¹⁰Watubula okusolo mbu, Rahabu,[6] nokwira, khulwa amaniko amakhongo wahula abasukubo.

¹¹Likulu nelilio, khandi eshialo shiosi neshishio; niwe owalonga eshialo nende biosi ebilimwo.

¹²Walonga emasaba nende emulambo. Eshikulu shia Tabori nende shia Herimoni, bikhoya nibikhwitsoomia.

¹³Obunyalibwo nobukhongo khandi amaaniko namakhongo

¹⁴Oburuchibwo bwaralila mubulunjishi, obukhalachi nobwahabwene. Obuheelibwo oburalilu nende obwisikwabwo bulolekhanga mubuli eliokhola.

¹⁵Nabeikhabi abakhwinamilanga, nibakhwimbila tsinyimbo, abachendanga mubulafu bweshisashio!

¹⁶Bekhoyanga eshiteere tulu khulwa okhubela iwe, betsoomia eliiralio khulwa obulayibwo.

¹⁷Okhuhelesinjia ifwe obuhuli obukhongo, ne mubuheelibwo okhunyalilanga okhuhula.

¹⁸Iwe OMWAMI Nyasaye, wakhwahulila omulindi wefwe, iwe Nyasaye Omutakatifu wa Isiraeli, wakhuhelesia omuruchi wefwe.

¹⁹Okhubirira mwilolelo mumiyika chiabira, waboolela omukhalabaniwo omusuubilwa ori, “Ekhoonyile omulwani wamani nehaana olusimbi khu owandahula okhurula mubandu.

²⁰Ndemeeshe omukhalabani wanje Daudi okhuba omuruchi, emutsushililekhwo amafura amatakatifu.

²¹Amaani kanje kalabetsanga ninaye buli lwosi, nabwo obunyali bwanje bulamumeetanga amaani.

²²Abasukube shibalamuhulakhwo ta, nabo abamayanu shibalamuyinga tawe.

²³Ndalatubula abasukube imbeliwe, nende okhwira abamusila boosi.

²⁴Obwisiikwa bwanje nobuheeli bwanje oburalilu bilabetsanga ninaye, buli lwosi ndalamunyalilanga okhuhula abasukube.

²⁵Ndalabambula lihangalie okhurula khunyanza ya Hakari okhuula khumwalo kwa Yufurate.

²⁶Alahabila naboola ari, ‘Niwe papa wanje, khandi Nyasaye wanje, niwe omulindi wanje khandi omuhonia wanje.’

²⁷Nasi ndalamukhola okhuba omwikulanda wanje, khandi omukhongo mubaruchi bokhushialo boosi.

²⁸Ndalatsiililila okhumumanyia obuheeli bwanje oburalilu obushia nobushia, khandi indakano yanje ninaye yilabetsangaho obushia nobushia.

²⁹Oburuchibwe bularalila shinga likulu, nabo abolwibulolwe balabetsanga abaruchi inziayo.

³⁰Nebutswa abolwobulolwe nibalekha okhulonda amalako kanje, nibalamenya okhulondana namalako kanje ta,

³¹nibalechelesia amalachilisio kanje, mana baleshe okhulinda amalako kanje,

³²kho emba ndabahelesia eshinyasio khulwa obwonooni bwabwe, nebakhola okhunyakhana khulwa obumayanu bwabwe.

³³Nebutswa shindalalekha okhuheela Daudi, noho okhulekha okhuusia obusuubisie bwanje khuye tawe.

³⁴Shindalafunaka indakano yanje ninaye, noho kata okhulekha okhuusia lilala khukandamulaka tawe.

³⁵Ndetsuba khulwa eliira lianje litakatifu lulala lwonyene nemboola endi, shielikatiakhwo Daudi tawe.

³⁶Olwibulolwe lulatsiililila okhubaho obushia nobushia, nabwo oburuchibwe bulatsiililila okhubaho khulwa oluhono lweliuba lishiakhanga.

³⁷Bularalisibwa obushia nobushia shinga omwesi, bularalila khulwa oluhoono lwe likulu lishiliho.”

³⁸Nebutswa bulano osinyishiile omuruchiwo omwahule, omuleshile khandi omulobile.

³⁹Ofunache indakano yawakaasia nomukhalabaniwo, ofwabiye olusimbilwe nolufuuba hasi mulufu.

⁴⁰Wakwisiiye hasi amasiisi kelitookholie, nolekha tsingobatsie tsiosi nitsilikuluushe.

⁴¹Boosi ababirangaho bebaanga ebindubie, nabo abamenyanibe bamutseshelela.

⁴²Ochinguulile abasukube, nobakhola boosi okhutsaatsahala.

⁴³Okholile ebimanulwabie bielihe okhubula emilimo, nomukhola okhuhulwa mwihe.

⁴⁴Omunuulile indabushiye yoburuchi, nende okhufuuba hasi eshifumbishie shioburuchi.

⁴⁵Wimbichitiye tsinyanga tsiobulamubwe, nokhumufuunikha neshifwimbwa murwe.

⁴⁶Iwe OMWAMI Nyasaye, olebisa obushia nobushia noho? Lirumalio lilatsiililila okhusamba okhuula liina?

⁴⁷Yitsulila OMWAMI Nyasaye shinga olwa obulamu bwefwe buli obwimbichiti, yitsulila mbu, fwesi abawalonga khuli abandu nabandu abalifwa.

⁴⁸Niwiina ounyala okhutsiililila okhumenya nalafwa ta? Niwiina ounyala okhuchweya okhutsia mushilindwa?

⁴⁹OMWAMI Nyasaye, obuheelibwo oburalilu obwali okhurula khale buli heena? Akawasuubisia okhukholela Daudi kali heena?

⁵⁰Yitsulila OMWAMI Nyasaye, shinga olwa isie omukhalabaniwo enyekungwa, shinga olwa enjinganga amanyeko kabandu bamahanga.

⁵¹Iwe OMWAMI Nyasaye, abasukubo banyekanga omuruchi wa iwe waahula. Bamunyekanga hoosi ahatsia

⁵²OMWAMI Nyasaye yetsoomibwe obushia nobushia, Amina! Amina.