Read wanga TSITSABULI 9 Bible Online

TSITSABULI 9 - wanga bible

TSITSABULI 9

¹Khumurereesi wetsinyimbo: Yimbilwe mumayosi kokhwikhuula. Itsabuli ya Daudi Iwe OMWAMI Nyasaye, ndalemba nekhwitsoomia nomwoyo kwanje kwosi. Ndalarumbula habulafu ebikholebio biosi biamakana.

²Ndalekhoya nesaangaala mwiwe. Ndalakhwitsoomia iwe Nyasaye Omukhongo Muno.

³Olwa abasuku banje bashiukhana, besichirala nibakwa hasi, boosi nibafwa.

⁴Okhuba okhalaache eshiina shianje habwene, wikhaale khushifumbishio shioburuchi, nokhalaka eshiina habwene.

⁵Wahalabiile abamahanga kandi, nomulula abamayanu, warusiliyeho elala ameera kabwe, shikalitsulilwakhwo khandi tawe inziayo.

⁶Abasuku bamululiilwe elala, wasasiye amatookho kabwe koosi, abulaho ouketsulila khandi tawe.

⁷Nebutswa OMWAMI Nyasaye arukanga inziayo, yekhaale khushifumbishie shioburuchi khulwa okhukhalaka eshiina.

⁸Akhalachilanga eshialo mubulunjishi, akhalachilanga amahanga eshiina habwene.

⁹OMWAMI Nyasaye nobwilushilo khwabo abasandibwa, niye olukoba lwokhwibisamwo mubise biamatinyu.

¹⁰Abakhumanya iwe Nyasaye baretsanga obunaayi bwabwe mwiwe, okhuba iwe OMWAMI Nyasaye shiolekhanga omundu yesi yesi oukhukhaaba tawe.

¹¹Mumwimbile nimwitsoomia OMWAMI Nyasaye, ourukanga Zayuni. Murumbule akebikholebie mumahanga!

¹²Nyasaye yetsulilanga abasandibwa, shiyebililanga okhuhaaba khwabwe tawe.

¹³Iwe OMWAMI Nyasaye, umbeele tsimbabasi. Lolakhwo shinga olwa abasuku banje basandia! Niwe ouhonokosinjia okhurula mukhufwa,

¹⁴kho mbu, ekhwitsoomie imbeli wabandu ba Yerusalemu, nembatoonyela koosi akachilanga nekhwitsoomia. Ndalekhoya okhuba iwe wambonia.

¹⁵Abamahanga bakwile mubuko bwabeene bayaba, batiililwe mumireko chiabeene bafisa.

¹⁶OMWAMI Nyasaye yelolesiye omwene olwa akhalaache eshiina habwene, nabo abamayanu batiliilwe mubikhole biabwe abeene.

¹⁷Abamayanu balahwela Emakombe, abamwibilila Nyasaye boosi balahwela Emakombe.

¹⁸Nebutswa abatakha shibalebililwa buli lwosi ta, khandi obunaayi bwabamanani shibulasikha inziayo tawe.

¹⁹Bukha, OMWAMI Nyasaye! Shiolafuchilila abandu nabandu okhukhuhula tawe! Lekha amahanga ketse imbeliwo, nokakhalachila eshiina.

²⁰Iwe OMWAMI Nyasaye, okareemwo oburi, lekha abamahanga kandi bamanye mbu, bo nabandu nabandu butswa.